Datorren astelehenetik urriaren 21etik aurrera, DB04 (Mallabia>Deba>Ondarroa) lineak espedizio bat izango du Deban, 6: 00etan, lanegunetan, egunero Soraluzera lanera joaten diren pertsonei zerbitzua emateko.
Mugikortasuneko, Turismoko eta Lurralde Antolaketako Departamentuak Lurraldebusen zerbitzua hobetzen jarraitzen du Deban, beste espedizio bat gehitu baitu. Zehazki, DB04 lineak (Mallabia>Deba>Ondarroa), astelehenetik aurrera, irteera bat izango du lanegunetan, 6: 00etan, Debatik, pertsona talde batek egunero Soraluzera lanera eramaten dituen beharrei erantzuteko.
Horixe adierazi du ostiral honetan Mugikortasun, Turismo eta Lurralde Antolaketako diputatu Azahara Dominguezek. Diputatuak Debako alkate Alazne Txurrukarekin batera hobekuntza hauen onuradunekin, dibertsitate funtzionala duten langile talde bat, eta beren senideekin bilera izan du.
Azahara Dominguezek azaldu duenez, zerbitzua 6: 15ean ateratzen zen Mendarotik, baina, erabiltzaileek egindako eskaera aztertu ondoren, urriaren 21etik aurrera, lanegunetan 6: 00etan aterako da Debatik.
“Garraio publikoa oinarrizko eskubideak eskuratzeko atea da, hala nola hezkuntza, osasuna, lana edo aisialdia, eta, horregatik, egunero lan egiten dugu gure zerbitzuak gure erabiltzaileek behar dutenari erantzuna eman diezaion. Horretarako, funtsezkoa da erakundeok elkarrekin lan egitea zerbitzua herritarren benetako beharretara egokitu dadin. Garraio publiko jasangarri, eroso, seguru, irisgarri eta lehiakor baten bidez bakarrik lortuko dugu Gipuzkoa hobeto kohesionatuta egotea eta sozialki justuagoa izatea, eta, horrez gain, gero eta gipuzkoar gutxiagok ibilgailu pribatua behar izatea joan-etorrietarako”, adierazi du diputatuak.
Dominguezek gogorarazi du hobekuntza hau bere departamentua eta Debako Udala egiten ari diren erakunde arteko lanaren beste emaitza bat dela. Joan den ekainean, autobus-geltoki irisgarriagoa, erosoagoa eta seguruagoa jarri zen ostatuaren inguruan, Itziarko toki-erakunde txikian, eta erabiltzaileen eskura jarri zen beste kokaleku bat, autobusa iristeko modu erosoago eta seguruagoan itxaron ahal izateko.
"Garraio publikoaren erabilera sustatzeko eta herritarren beharretara egokitzeko lanean jarraituko dugu gainerako erakundeekin batera", berretsi du diputatuak.
Bestalde, Alazne Txurruka alkateak honako hau esan du: “Lurraldebuseko zerbitzu honen egokitzapenak Debako bizilagun talde batek Udalari egindako eskaera zuzen bati erantzuten dio, eta egokitzapen hori posible izan da Udalaren eta Aldundiko Mugikortasun Sailaren arteko lankidetza estuari esker. Horrelako ekintzek mugikortasuna eta horri lotuta, herritarren ongizatea hobetzeko elkarrekin lan egiteko dugun konpromisoa berresten dute.
Espedizio berri hau gehitzeak, aurretik egindako beste hobekuntza batzuekin batera, bistako egiten du Deban garraio publikoa hobetzeko dugun konpromisoa irmoa dela. Horregatik guztiagatik, eskerrak eman nahi dizkiot Azahara Dominguez diputatuari zerbitzuak gure herritarren benetako beharretara egokitzeko uneoro agertu duen jarrera aktibo eta lagunkoiagatik”.