Nabarmentzekoak

Lan mutualitateak

Erretiro edo baliaezintasun pentsio bat jasotzen dutenek eskubidea baldin badute, Auzitegi Gorenaren 255/2023 Epaiari jarraituz, pentsio hori errenta aitorpenean sartzeko murriztapen bat aplikatuta, aitorpena edozein modalitatetan aurkezteko unean egin ahal izango dute hori:

• Autolikidazio proposamen bat prestatu badiegu, proposamenaren 3. orrian izango dute pentsioaren murriztapenaren kalkuluaren xehetasuna. Proposamena telefonoz edo Internet bidez onartzea gomendatzen da. 
• Autolikidazio proposamenik ez bazaie prestatu, zerga informazioan sar daitezke lan etekinen koadroan pentsioaren murriztapenaren xehetasuna ikusteko eta zerga informazio hori ZergaBidea programara deskargatzeko, aitorpena Internet bidez aurkezte aldera. Modalitate mekanizatuaren bidez ere aurkez dezakete aitorpena.

Proposamenean edo zerga informazioan pentsioaren murriztapena ageri ez bada, Gizarte Segurantzak informazio hori eman ez digulako izango da. Horregatik, autolikidazio proposamena prestatu badiegu, hura onartzea gomendatzen zaie; izan ere, errenta mekanizatuko bulegoetan ezin izango dugu sartu pentsioaren murriztapena.

Pentsioaren integrazio-ehunekoa kalkulatzeko, Auzitegi Gorenaren 20/2024 Epaiari jarraitu zaio, eta, beraz, kotizatutako lan-bizitza osoaren ordez pentsioaren oinarri arautzailearen % 100era iristea ahalbidetu zuten kotizazioak gertatu ziren aldia hartuko da kontuan. Kalkulu modu hau zergadunentzat mesedegarriagoa izango da.

BakQ-a

Departamentuaren zerbitzu telematikoetara sartzeko –errenta eta ondare kanpainan zerga informazioa eskuratzeko eta aitorpenak Internet bidez aurkezteko, esate baterako–, BakQ-a edo ziurtagiri elektronikoa eduki behar da.
BakQ-aren ezaugarri nagusiak:

• Bulegoetan ez ezik, Internet bidez ere lortu daiteke, inora bertaratu gabe.
• Hirugarrenen ordez jarduteko aukera ematen du, adibidez, ezkontidearen edo beste senide baten zerga informazioa eskuratzeko eta haren aitorpenak aurkezteko. Horretarako, ordezkaritza izapidetu beharra dago 001 ereduaren bidez.
• Aukera ematen du Gipuzkoako Foru Aldundiaren eta beste administrazio batzuen gainerako izapide elektronikoetan sartzeko.

Fortuna handien gaineko elkartasun zerga

Kanpaina honetan zerga berri hau aurkez daiteke. Aurkezteko epea eta modua ondare zergarako dauden berberak dira. Internet bidez aurkeztuko da, ZergaBidea programa erabiliz, eskuz bete, zerga informazioa deskargatu edo ondare aitorpena inportatu ondoren.

Zerga informazioa (errenta)

Zerga informazioa errenta programara jaitsi daiteke aitorpena Internet bidez aurkezteko. 2023ko zerga informazioan kontzeptu berriak agertuko dira, eta, besteak beste, oinarrizko ikerketarako mezenasgoari emandako dohaintzak, lehen aldiz %35ean kengarri direnak.

Zerga informazioa (ondarea eta elkartasun zerga)

Ondare zergaren eta fortuna handien gaineko elkartasun zergaren programetara ere jaitsi daiteke zerga informazioa.

Kriptodirua (diru birtuala)

Kriptodirua bereizita sartuko da aitorpenetan.
Errenta aitorpenean gako espezifiko bat dago diru birtualaren eskualdaketatik datozen ondare irabazi edo galeretarako.
Ondare aitorpenean eta fortuna handien gaineko elkartasun zergarenean, berariazko atal batean adierazten dira.

Errenta mekanizatua

Mekanizatua – Modalitate hau ezin erabiltzeko kasu berriak

Aurtengo kanpainarako, aitorpen mekanizatua egitea eragozten duten kasu berriak gehitu dira. Hona hemen kasu berri horiek:

• 5 ondare eskualdaketa baino gehiago egitea.
• Balore merkatu arautuetako batean negoziatzeko onartu gabeko merkataritza sozietateen akzio edo partaidetzak eskualdatzea.
• Diru birtuala (kriptodirua) eskualdatzea.
• Zergapetutako eragiketak egitea finantza produktu eratorriak erabilita (aukerak, gerokoak, bermeak, diferentzien araberako kontratuak, etab.).

Mekanizatua – Hitzordua

Aitorpen mekanizatua gure bulegoetan aurkezteko, aldez aurretik hitzordua hartu behar da.

Uztailaren 1ean, aitorpenak aurkezteko azken egunean, egun horretarako hitzorduak eskatzea onartuko da.

Mekanizatua – SMS

• Txanda hartzen denean (aitorpena zein bulegotan, noiz eta zein ordutan aurkeztu behar den gogorarazteko).
• Txanda bat bertan behera uzten denean.

Mekanizatua – Ordaintzeko erak

Autolikidazio mekanizatuaren emaitza ordaintzekoa bada, aitorpena egiteko unean ordainketa nola nahi den egin aukera daiteke: helbideratuta edo ordainketa-gutuna erabilita. Azken kasu horretan, ordainketa-gutuna emango zaio, finantza-erakunde laguntzaile baten kontu baten kargura ordaintzeko.

Errenta proposamena

Proposamena – Posta bidezko komunikazioa

Kanpaina honetan zehar, proposamena jasotzen dutenei postaz bidaliko zaizkien komunikazioak bi eratakoak izango dira.

• Aurreko urtean proposamena internet bidez onartu zutenei edo orain arte aitorpena Gipuzkoan aurkeztu ez dutenei, bi datu baino ez zaizkie bidaliko komunikazioan: proposamena webgunean ikusteko kodea eta autolikidazioaren emaitza.
• Gainerako zergadunei komunikazio osoa bidaliko zaie, proposamena barne, aurreko urteetan bezala.

Neurri horrekin informazioaren segurtasuna hobetu nahi da,  eta aurrezpen handia lortzen da aldi berean.

Proposamenetan QR kode bat agertuko da, aplikazioan sartzea errazteko, eta hura Internet bidez ikusi eta onartu ahal izateko.

Proposamena – Onartzea aldaketak sartuta eta sartu gabe

Aurreko kanpainetan bezala, proposamena telefonoz edo internet bidez onartu ahal izango da, emaitza ekonomikoa ezertan ere aldatu gabe edo bost kontzeptu hauetako bat aldatu eta gero:

• Etxebizitza errentan emateagatik lortutako etekinak.
• Lokalak errentan emateagatik lortutako etekinak.
• Kuota sindikalaren kenkaria.
• Dohaintzen kenkaria.
• Ohiko etxebizitza errentan hartzeagatik aplikatutako kenkaria.

Proposamena – Programara jaistea eta internet bidez aurkeztea

Gainera, posible izango da proposamena Zergabidea plataforma elektronikora jaistea, barruan edozein aldaketa egin eta aitorpena Interneten bidez aurkezteko. Prozesu hori errazte aldera, ohiko autentifikazio sistemak erabiltzeaz gainera (BakQ eta ziurtagiria) proposamenaren onarpen kodea ere erabiliko ahal izango da proposamena jaitsi eta aitorpena internet bidez aurkezteko.

Proposamena – Erregistratu gabeko kontu korrentea

Proposamena Internet bidez onartzen bada, kobratzeko edo ordaintzeko kontua aldatu ahal izango da, beti bezala. Posible izango da Ogasunean erregistratuta ez dagoen kontu bat aukeratzea, betiere titulartasuna frogatzen bada proposamenen aplikaziotik dagokion frogagiria igoz.

Errenta, Ondarea eta Elkartasun Zerga (Internet)

Errenta aitorpena hiru modalitate erabiliz aurkez daiteke (proposamena, mekanizatua eta Internet); aldiz, ondare aitorpena eta elkartasun zergarena Internet bidez baino ezin dira aurkeztu.

Internet – ZergaBidea programa

Internet bidezko aurkezpenean, hiru zergen aitorpenak ZergaBidea programaren bitartez aurkezten dira.

Internet – Programa eskuratzea

Programa eskuratzeko autentifikazioa beharrezkoa da, eta izan daiteke:

• Errenta, ondarea eta fortuna handien elkartasun zerga: BakQ-a edo ziurtagiria.
• Errentarako: baldin eta BakQ identifikaziorik edo ziurtagirik eskatu ez bada, aitorpena kontraste datuarekin aurkeztu daiteke (azken urteetako errenta aitorpenaren kuota edo proposamenaren onarpen kodea). Horretarako, alta eskatu behar da BESTE SARBIDE BATZUK apartatuan, https://zergabidea.gipuzkoa.eus helbidean, e-posta kontu bat eta pasahitz bat erabiliz. 

Internet – Aitorpena betetzea

Errenta aitorpenak horrela bete daitezke:

• Eskuz.
• Zerga informazio jaitsiz, BakQ identifikazioa, edo ziurtagiria erabilita.
• Proposamena jaitsiz, BakQ-a, ziurtagiria edo kontraste datua (proposamenaren onarpen kodea) erabilita.
• Simulazio programarekin egindako aitorpen bat inportatuz.
• Aurreko ekitaldiko aitorpena inportatuz.

Ondarearen aitorpenak horrela bete daitezke:

• Eskuz.
• Zerga informazioa jaitsiz, BakQ-a edo ziurtagiri elektronikoa erabilita.
• Simulazio programarekin egindako aitorpen bat inportatuz.
• Aurreko ekitaldiko aitorpena inportatuz.

Fortuna handien gaineko elkartasun zergaren aitorpenak honela bete daitezke:

• Eskuz.
• Zerga informazioa BakQ edo ziurtagiriarekin deskargatuz.
• Ondare aitorpen bat inportatuz.

Internet – Frogagiriak

Frogagiriei dagokienez, errenta aitorpena internet bidez aurkezten duten zergadunek, erabiltzen duten autentifikazio sistema edozein dela ere, ez dute frogagiririk aurkeztu beharko baldin eta bi baldintza hauek betetzen badituzte:

• Beren ohiko etxebizitza aitortzen den ekitaldian erosita ez egotea, eta
• Aitorpenean sartzen dituzten kontzeptuak eta Zerga Informazioan ageri direnak berdinak izatea.

Hori programak berak egingo du, erabiltzaileari ohartarazita, bete diren laukien arabera.

Partikularrek internet bidez edo herritarren arretarako bulegoetan aurkeztu ditzakete errentako frogagiriak.

Ordezkari profesionalek (aholkulariak eta kudeatzaileak) nahitaez Internet bidez aurkeztu behar dituzte errentako frogagiriak.

Ondarearen eta elkartasun zergaren aitorpenetarako, ez da frogagiririk aurkeztu behar.

Internet – Ordezkari profesionalak

Ordezkatuen errenta, ondare edo elkartasun zergen aitorpenak aurkeztu ahal izateko, ordezkari profesionalek ordezkaritzako 001-P edo 001-RP eredu bat eduki behar dute erregistratuta.

320/2017 Foru Aginduaren 1.1 artikuluan aurreikusitakoaren arabera, autolikidazio guztiak Internet bidez aurkeztu behar dituzte. Ezin dute aitorpen mekanizaturik egin.

Internet – Ordainketa eta bigarren aurkezpenak

Aitorpenak internet bidez aurkezten diren kasuetan, erraztasunak izango dira zorraren ordainketa kudeatzeko (kontu korrontea, ordainketa-gutuna, ordainketa-pasabidea eta gerorapenak) eta bigarren aurkezpenak egiteko (ordezkoak eta osagarriak).

Internet – Aitorpen osagarriak

Zergen autolikidazio osagarriak internet bidez aurkeztu ahal izango dira. Horretarako, honako hau hartu beharko da kontuan:

• Autolikidazio osagarri bat aurkeztu ahal izateko, baldintza hauek bete behar dira: jatorrizko aitorpen bat aurkeztea aldez aurretik, aitorpen horretan akatsak edo omisioak izatea, eta akats edo omisio horien ondorioz behar baino gutxiago ordaintzea edo jasotako itzulketa zilegi zena baino handiagoa izatea.
• Autolikidazio osagarria aurkezten da jatorrizko autolikidazioarekin ordaindutakoa baino zenbateko handiagoa ordaindu behar denean, edo zergadunak behar baino zenbateko handiagoa kobratu duenean. Beste edozein kasutan, idatzi bat aurkeztu beharra dago jatorrizko autolikidazioaren zuzenketa eskatzeko.
• Autolikidazio osagarria epe barruan aurkeztu daiteke, bakar-bakarrik, baldin eta jatorrizko autolikidazioaren emaitza ordainduta edo kobratuta badago (ordainduta errenta, ondarea edo elkartasuna) edo hura kobratu bada (errenta).
• Osagarria epez kanpo aurkeztu daiteke.
• Errentaren (109), ondarearen (714) edo fortuna handien gaineko elkartasun zergaren (718) aitorpen osagarria erabateko aitorpen osagarria da; aldiz, beste autolikidazioen aitorpen osagarriak (110 edo 300 ereduenak, kasu) partzialak dira.
• Osagarri partzialetan jatorrizko aitorpenean falta diren datuak baino ez dira sartu behar.
• Autolikidazio osagarriak osoak direnean, datu guztiak sartu behar dira, jatorrizkoan jarritakoak eta aipatu gabe utzitakoak. Gainera, erregularizazioa egin beharra dago, eta horrek beti emango du ordaintzeko emaitza bat, zeina aterako baita autolikidazio osagarriaren emaitza eta zergadunak aurkeztutako autolikidazioengatik eta administrazioak egindako likidazioengatik ordaindu eta kobratu den zenbatekoa elkarrekin alderatuta.
• Aitorpen osagarri partzial baten adibidea (110 eredua):
  • Aurkeztu den jatorrizko aitorpen batek 1.000 euro ordaintzeko emaitza izan du, eta zenbateko hori osorik ordaindu da.
  • Aitortzailea ohartu da aitorpen horretan ez zuela sartu langile bati dagokion 500 euroko atxikipena, aitorpen osagarri bat aurkeztu du, eta 500 euro ordaintzea atera zaio. Aitorpen osagarri partzial bat aurkeztu du, jatorrizkoan falta zen zenbatekoagatik.
• Errentaren erabateko aitorpen osagarri baten adibidea (ondarerako eta elkartasun zergarako ere balioduna):
• Aurkeztu den jatorrizko aitorpen batek 1.000 euro ordaintzeko emaitza izan du, eta zenbateko hori osorik ordaindu da.
• Aitortzailea ohartu da aitorpen horretan sartu gabe utzi zuela errenta jakin bat, eta aitorpen osagarri bat aurkeztu du.
• Aitorpen osagarri hori osoa izango da, datu guztiak izango dituelako, jatorrizkoan aitortutakoak eta sartu gabe utzi zen errenta.
• Era horretan,  aitorpen osagarriaren emaitza 1.200 eurokoa da, baina hori ez da ordaindu behar den zenbatekoa.
• Zenbat ordaindu behar den kalkulatzeko, egoera erregularizatu beharra dago.
• Demagun adibide horretan administrazioak ez duela egin inolako likidaziorik eta zergadunak ez duela aurkeztu beste ezein autolikidaziorik. Kasu horretan, erregularizazioaren emaitza 200 euro ordaintzea izango da (1.200-1.000).
• Erregularizaziotik ez bada ateratzen ordaintzeko emaitzarik, ezin da aurkeztu aitorpen osagarririk. Idatzi bat aurkeztu beharko litzateke jatorrizko autolikidazioa zuzentzeko.
• Errenta zergaren autolikidazio osagarrian jatorrizko autolikidazioan aukeratutako tributazio mota bera aukeratu beharra dago. Kontrakoa eginez gero, autolikidazio osagarri hori ezingo da aurkeztu, eta idatzi bat aurkeztu beharko da jatorrizko autolikidazioa zuzentzeko.