2021eko uztailaren 1etik aurrera, “minileihatila bakarra” enpresaria edo profesionala finkatuta ez dagoen estatu kideetan azken kontsumitzaile partikularrei emandako zerbitzu guztietara zabalduko da, baita ondasunen urrutiko salmentetara eta ondasunen barne entrega jakin batzuetara ere. Beraz, "Leihatila bakarra" (One Stop Shop, OSS) izena hartuko du.

Leihatila Bakarrak hiru modalitate ditu:

• Batasunaren kanpo araubidea (EUOSS)
• Batasuneko araubidea (UOSS)
• Inportazio-araubidea (IOSS)

Modalitate desberdinak enpresaburuek edo profesionalek azken kontsumitzaileei egindako entregei edo prestazioei dagozkie soilik (B2C eragiketak).

Leihatila bakarra (OSS) aukerako araubideek osatzen dute, eta Europar Batasun osoan (EB) azken kontsumitzaileei ondasunak entregatu eta/edo zerbitzuak ematen dizkieten enpresaburuek edo profesionalek BEZaren arloan dituzten betebehar formalak sinplifikatzen dituzte; izan ere, aukera ematen du haiek kontsumoko estatu kide bakoitzean identifikatu eta alta eman behar ez izatea. Ondorengoa ahalbidetzen du:

• BEZaren ondorioetarako, estatu kide bakar batean erregistratzea, beste edozein estatu kidetan kokatutako bezeroei egindako ondasun eta zerbitzuen salmenta guztietarako, baldintza guztiak betetzen dituztenean.
• Identifikazioko estatu kidean BEZ elektronikoaren aitorpen bakarra aurkeztea eta ordainketa bakarrean likidatzea ondasun eta zerbitzuen salmenta guztiengatik sortutako BEZa.

Horretarako, berariaz erregistratu beharko dira dagokien araubide edo erregimenean.

Identifikazio estatu kidea da enpresaburua edo profesionala leihatila bakarreko erregimenak aplikatzeko erregistratzen den estatua. Haren bidez, gainerako estatu kideetako leihatila bakarreko eragiketen ondoriozko zerga obligazioak beteko dira.

Estatu hori enpresaburu edo profesionalaren egoitzak edo establezimenduak zehazten du, edo, hala badagokio, bitartekariarenak. Enpresaburua edo profesionala Batasunean finkatuta ez badago, identifikazio egoera aukeratu ahal izango da.

Kontsumoko estatu kidea izango da:

• Zerbitzu prestazioen kasuan, zerbitzuak ematen diren estatu kidea, zergaren araudian edo beste estatu kide batzuetako legerietan xedatutakoaren arabera.
• Europar Batasunaren barruko urruneko ondasun-salmenten kasuan, ondasunak bezeroari bidaltzeko bidalketa edo garraioa iritsi den estatu kidea
• Interfaze digital baten bidez emandako ondasunen kasuan, entregatutako ondasunen bidalketa edo garraioa estatu kide horretan bertan hasi eta amaitzen denean.

Batasuneko araubidea (UOSS)

Araubidearen xede diren eragiketak egiten dituzten enpresaburuek edo profesionalek baliatu ahal izango dute araubide hori, Erkidegoan finkatuta egon edo ez.

Hala ere, araubidean aitortu beharko diren eragiketak aldatu egiten dira subjektu pasiboa Erkidegoan ezarrita dagoen ala ez kontuan hartuta. Bereziki:

1.- Batasunean finkatutako enpresaburuek edo profesionalek honako araubide hau izango dute:

• Enpresaburu  edo profesional izaerarik ez duten eta Batasunean finkatuta dauden baina araubide berezi honetara bildutako enpresaburu edo profesionalarena ez den estatu kide batean finkatuta dauden pertsonentzako zerbitzu prestazioak, betiere prestazioak enpresaburua edo profesionala finkatuta ez dagoen estatu kide batean kokatuta badaude.
  Zerbitzu prestazioak enpresaburuaren egoitzako estatu kidean edo BEZaren ondorioetarako finkatuta dagoen estatu batean badaude, prestazio horiek BEZaren araubide orokorraren arabera aitortu beharko dira dagokion herrialdean, ez OSS erregimenaren arabera.
• Ondasunen batasun  barruko urrutiko salmentak, subjektu pasiboa erregistratzen den estatu kidean daudenak barne, bai eta BEZaren ondorioetarako finkatuta dagoen beste estatu kide batean daudenak ere.
  Garrantzitsuena batasun barruko urrutiko salmentak, izatea da, ondasunak bi estatu desberdinen artean garraiatzen dituztenak, eta berdin dio  ondasunak iristen diren lekuan enpresaburu edo profesional izaera duen.

2.- Batasunean finkatuta ez dauden enpresaburuek edo profesionalek  Batasuneko araubidean bakarrik aitortu ahal izango dituzte ondasunen batasun barruko urrutiko  salmentak.

Batasuneko azken kontsumitzaileei ere zerbitzuak ematen badizkiete, kanpo araubidearen bidez aitortu ahal izango dituzte salmentak, baina ez Batasunaren araubidean.

3.- Interfaze elektronikoek (Batasunaren barruan edo kanpoan kokatuak), baldin eta ondasun entregen subjektu pasibotzat hartzen badira, hauek sartuko dituzte araubidean:

• Beraiek esku hartzen duten ondasunen batasun barruko urrutiko salmentak, merkantzien saltzailea Batasunean finkatuta ez dagoenean.
• Ondasunen barne entregak (estatu kide batetik bestera garraiatu gabe), merkantzien saltzailea Batasunean finkatuta ez dagoenean. 
   

2021eko uztailaren 1etik aurrera, desagertu egiten da 22 €-tik beherako balioa duten ondasunen inportazioaren aldeko salbuespena. Beraz, EBn inportatzen diren ondasun komertzial guztiek, beraiek duten balioa edozein dela ere, dagokien inportazioaren BEZa ordaindu beharko dute.

Testuinguru horretan, aldi berean leihatila bakarreko hautazko araubide berezi bat sortzen da inportatutako ondasunen urrutiko salmentetarako, 150 €-tik gorako baliorik ez badute. Izan ere, araubide hori aplikatzen bada, inportazioa zergapetu ordez (salbuetsita geratuko litzateke), helmugan entregatzea baino ez da kargatzen. Horrela, salmentengatik sortutako BEZaren aitorpena eta ordainketa erraztu egiten dira, identifikazioko estatu kidean aitorpen bakar bat aurkeztuta.

Zehazki, “inportazio erregimen" izenez ezagutzen den araubide horrek aukera ematen dio entregaren subjektu pasiboari (dela saldutako ondasunaren hornitzaile jabea, dela entrega errazteagatik interfaze elektroniko bat, ondasunen jabe ez den arren subjektu pasibotzat hartzen dena), batetik, bezeroari urrutiko salmenta horien ondoriozko BEZa kobratzeko eta, bestetik, hura aitortu eta inportazioetarako leihatila bakarreko sistema baten bidez sartzeko (IOSS). Inportatutako ondasunaren hartzaile den kontsumitzaileak, aduana agintaritzari inportazioagatik BEZa ordaindu beharrean, erosketa prezioaren zati gisa ordaintzen du zerga.

Inportazio araubideak balio txikiko ondasun inportatuen urrutiko salmentak estaltzen ditu, hau da, honelako ondasun entregak:

• Ondasunak hirugarren herrialde edo lurralde batetik igortzen/garraiatzen dira, bezero partikularrari entregatzen zaizkion unean, eta
• Ondasun horiek 150 €-tik beherako berezko balioa duen bidalketa batean jaulkitzen dira, eta
• Hornitzaileak berak edo haren izenean garraiatzen ditu ondasunak, baita hirugarren lurralde edo herrialde batetik estatu kide batean baldintzak betetzen dituen bezero bati edo beste edozein pertsonari ondasunak bidaltzen edo garraiatzen zeharka esku hartzen duenean ere, eta
• Ondasunak ez daude EBren zerga bereziei lotuta (normalean, alkohola edo tabako produktuak, BEZaren Zuzentarauaren 2. artikuluaren 3. apartatuaren arabera).
   

Ondasun entregaren zerga tasa entrega egin den estatu kidean ezarrita dagoena izango da. Praktikan, bezeroak adierazten du ondasunak zein estatu kidetan entregatu behar diren.

Ondasun gehienek BEZ-tasa arrunta dute; hala ere, batzuek BEZ-tasa murriztua dute, ondasunen izaeraren eta entrega egiten den estatu kidearen arabera. Europar Batasuneko BEZ motei buruzko informazioa estatu kide bakoitzaren webgunean eskura daiteke. Halaber, Europako Batzordeak esteka honetan zentralizatzen du informazio hori: http://ec.europa.eu/taxation_customs/tedb/splSearchForm.html

Inportazio araubidearen esparruan aitortutako balio txikiko ondasunen erabilera askerako izapideak BEZetik salbuetsita daude, baldin eta inportazio-erregimeneko erregistro zenbaki baliodun bat (NIOSS) ematen bada, aduanako aitorpena egiten den unean beranduenez. Helburua da ondasun berberen zergapetze bikoitza saihestea.