‘Recycling Top’ Garberan, bere jasangarritasun proiektua ezagutzeko

Gipuzkoako birziklatze eta berrerabilpenaren sektoreko ehuna osatzen duten hogeitahamar enpresa, elkarte, fundazio, unibertsitate, teknologia zentro eta ingurumen aholkularitza elkartu dira Garberan bere jasangarritasun proiektua ezagutzeko, energiaren aurrezpenean eta karbono aztarna murriztean.

Jose Ignacio Asensio: “Garberak nazioarteko abangoardia batzen du tokiko ekonomiaren sustapenarekin, eta erreferente bat da estrategia jasangarrien lidergoan eta tokiko enplegua sortzen”.Nuria Vegas: “Mugikortasun jasangarria sustatzea, ekonomia zirkularra bultzatzea eta energia-eraginkortasuna areagotzea dira Garbera berriaren erronka nagusiak, eta modu bateratuan eta elkarlanean ari gara gure helburuak lortzeko”.

José Ignacio Asensio Ingurumen diputatua izan da Gipuzkoako berrerabilpenaren eta birziklapenaren sektoreko ‘Recycling Top’ topaketaren buru. Jardunaldi hauen bidez, ‘GK Recycling’ Birziklapen Klusterreko enpresen ezagutzan sakondu nahi da, klusterreko kideen instalazioetara egindako bisiten bidez. Horietan, jarduera-prozesuak eta arrakasta-kasuak azaltzen dira, Gipuzkoako Ekonomia Zirkularrean arrakasta izan duten esperientziak in situ ezagutuz, prozesu horiek gauzatu dituzten pertsona eta enpresen eskutik.

Jardunaldi horretan, Garberak ekonomia-, gizarte- eta ingurumen-jasangarritasuna lortzeko dituen estrategia eta ekintza nagusien berri eman da, hala nola energia asko aurrezteko behar diren baliabideak hobetzea eta, beraz, karbono-aztarna murriztea.

José Ignacio Asensio Ingurumen diputatuak nabarmendu duenez, “oso garrantzitsua da Garbera bezalako gizartearentzako erreferenteek erakustea iraunkortasuna ez dela muga bat, ezta oztopo bat ere hazteko, aberastasuna eta enplegua sortzeko. Aitzitik, erakutsi dute jasangarritasunak eraginkorragoak eta, beraz, lehiakorragoak izateko tresnak ematen dizkigula.” Era berean, Asensiok azpimarratu duenez, “ohorea da Gipuzkoan Garbera bezalako merkataritza-zentro bat izatea, jasangarritasunaren aldeko apustu sendoa egiten duen eta egunero publiko osoari transmititzen dion zentro bat”.

Bestalde, Nuria Vegas Garberako gerenteak nabarmendu du garrantzitsua dela ‘GK Recycling’ bezalako klusterreko kide izatea. Kluster horrek aukera ematen du “sinergiak sortzeko, ezagutza bateratzeko eta esperientziak partekatzeko jasangarritasunaren ikuspegitik proiektuak zuzentzen dituzten enpresa eta profesionalekin”. “Garberan”, gaineratu du Nuria Vegasek, “ingurumenarekiko eta gizarte-ingurunearekiko konpromiso-balioak transmititzen saiatzen gara, kontsumitzaileek gero eta gehiago estimatzen dituzten balioak”. Garberako kudeatzaileak, erronka nagusi gisa, honako hau adierazi du: “mugikortasun jasangarria sustatzea gure merkataritza-gunera sartzeko, erronka nagusietako bat da, bai oinezkoen sarbideari, bidegorriari eta garraio publikoari dagokienez. Gaur egun, Garberako erabiltzaileen % 80 garraio pribatuan etortzen da, eta modu bateratuan lan egin behar dugu zifrak itzultzen saiatzeko”.

Vegasek adierazi duenez, “Garbera handituta, erabiltzaileen % 30 hazi gara, eta horrek hondakinak sortzea edo ura erabiltzea bezalako alderdiak areagotzen ditu, baina, hala ere, energia-kontsumoa % 20 murriztea lortu dugu”.

Garberakoa 2023ko lehen Recycling Top-a izan da. Ekimen horren bidez, Gipuzkoako Foru Aldundiko Ingurumen Sailak balioa eman nahi dio Gipuzkoak birziklatzearen arloan duen indarrari, eta sektoreak ekonomia zirkularraren barruan eta enplegu berdea sortzean duen garrantzia nabarmendu nahi du. Era berean, enpresei laguntza instituzionala emateko tresna izan nahi du, bai merkatu nazionalean bai nazioartekoan, eta aurkezpen-gutuna izan eta berrikuntza-sare berdea sortu.

José Maria González URWko Jasangarritasun zuzendariak eta Francisco Picouto Garberako Proiektua Eraikitzeko zuzendariak ere parte hartu dute. Azaldu dutenez, Garbera proiektuaren hazkundea iraunkortasunari buruzko parametro zorrotzenak kontuan hartuta egin da, eta eraikuntza jasangarriari buruzko Breeam ziurtagiria lortu da, bikain kalifikazioarekin, energia asko aurrezten delako eta, beraz, karbono-aztarna murrizten delako. Zehazki, karbono-aztarna %27 murriztu da, eta eguzki-panelak jarri dira; klimatizazio-sistema optimizatuak ezarri dira, aireztapen naturalari lehentasuna emanez, emisioetan neutroa den eraikina izateko helburua lortzeko.