Aldundiak finantzatutako hitzarmen bat sinatu dute Portuak eta Udalak, zazpi espazio publiko erabili eta mantentzeko

Pasaiako Portu Agintaritzak (PPA) eta Pasaiako Udalak akordio bat lortu dute portuko lursailean dauden espazio publikoak mantentzeko lagapena egiteko. Udalak mantentze-gastuari aurre egingo dio Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuaren finantzaketari esker.
Zehazki, irailaren 24ko udalbatzan onartutako eta bi aldeek sinatutako hitzarmenak 76.475 m2-ko azalera hartzen du Euskotrenen Herrerako geltokiaren eta San Pedroko Puntas arteko eremuetan: Herrerako biltegien estalkia (6.900 m2), Euskadi etorbidea 1 (4.700 m2), Euskadi etorbidea 2 (3.800 m2), Trintxerpe kaia (11.900 m2), lonja (26.600 m2 terrazaren edo estalkiaren eta plazaren artean), Arraunlari (8.400 m2), Torreatze-Puntas (6.500 m2). Espazio horietan, azken urteotan, Portu Agintaritzak, gainerako erakundeekin lankidetzan, urbanizazio-obra garrantzitsuak egin ditu.
Lankidetza-akordio berri hau aldez aurretik egin beharreko izapidea da, Gipuzkoako Foru Aldundiak, Mugikortasuneko, Turismoko eta Lurralde Antolaketako Departamentuaren bitartez, Pasaiako Udala finantza dezan portuko lurretan dauden espazio publikoak mantentzeko. Zehazki, akordio horren arabera, Udalak 400.000 euro jasoko ditu Aldundiaren eskutik, akordioan jasotako erabilera publikorako espazio irekien kontserbazioari eta mantentzeari (konponketak, argiteria, garbiketa, lorezaintza, etab.) ekiteko. Diru horrekin Udalak ez du inolako kosturik ordaindu beharko mantentze-lan horrengatik.

Espazioen mugaketa-plano honen arabera, mantentze- eta kontserbazio-lan erregularretan sartzen ez diren aparteko gastuak Pasaiako Portu Agintaritzaren kontura izango dira. Esate baterako, egiturako errefortzuak, sortzen diren espazioaren titularrak finantzatuko ditu. 

Aipatu behar da mantentzeko betebeharra espazioak jendearentzat irekita daudenean hasiko dela. Horrek esan nahi du jendeari ireki aurretik obrak behar dituzten kasu horietan, esate baterako Sprilurreko (Euskadi Etorbidea) eraikinaren urbanizazio berriaren kasuan, ez dela horrelakorik egingo PPAk obrak amaitu arte. 
Lankidetza-hitzarmenak lau urteko indarraldia izango du, eta urteko luzapenak egiteko aukera izango du. Joakin Telleria Pasaiako Portu Agintaritzako presidenteak eta Teo Alberro Pasaiako alkateak sinatu dute Pasaiako Udalean egindako ekitaldi batean, Azahara Dominguez Mugikortasuneko, Turismoko eta Lurralde Antolaketako diputatua ere bertan dela.

Alkateak adierazi du hitzarmen hau sinatzea "beste urrats bat" dela portu-hiria integratzeko bidean, eta pasaitarrentzat aisialdirako aukerak sortzen jarraitzen duela: "Hitzarmen honek aukera ematen digu bermatzeko herritarren egunerokotasunean ezinbestekoak diren espazioak erabilera publikorako irekita egongo direla aurrerantzean ere, eta egoera onean mantendu ahal izango ditugula Gipuzkoako Foru Aldundiaren lankidetzari esker".
"Akordio hau Portu Agintaritzak azken urteotan Portu eta Hiri arloan egin dituen jarduera guztien gailurra da, non 33.500 m2-ko espazio berriak gauzatu diren, hala nola herritarrei ireki zaizkien Lonjaren estalkia edo Herrerako biltegiena. Udalari eskerrak eman nahi dizkiogu Pasaiako bizilagunei irekitako guneen kalitatea bermatu ahal izateko lankidetza-akordio hau lortzeko eskaini duten erraztasun eta konpromisoarengatik," azpimarratu du Joakin Telleriak.
Bestalde, Azahara Dominguez diputatua pozik agertu da hitzarmena sinatu izanarekin, eta gogorarazi du "beharrezko aldez aurreko urratsa" dela bere sailak Udalak bere gain hartzen dituen mantentze-lanak finantzatu ahal izateko. Era berean, foru erakundeak Pasaiako badiaren biziberritze integralarekin duen "konpromisoa" berretsi du diputatuak. "Pasaiako badia lehengoratzera bideratutako jarduerak gure gobernuaren lehentasunezko ardatza izan dira eta dira, eta, beraz, Pasaiako Udala finantzatuko dugu hitzarmen honetan agintzen zaizkion lanak bere gain har ditzan. Pasaitarren gozamenerako espazioak berreskuratzea eta Pasaialdeko eremu osoa biziberritzea funtsezkoa da, herritarrek bizi-kalitatea hobetzeko ez ezik, Gipuzkoa justuago eta kuestionatuago baterantz aurrera egiteko ere".