Bularreko minbiziaren aldeko "marea arrosa" birtuala

Maite Peñak, Gizarte Politikako foru diputatuak, Mikel Sanchezek, Eusko Jaurlaritzako Osasun Saileko Plangintza, Antolamendu eta Ebaluazio Sanitarioko zuzendariak, eta Katxalin elkarteko Maite Valle, Gipuzkoako Bularreko eta Ginekologiako Minbiziak Kaltetutako Emakumeen Elkarteak, aurkeztu dute gaur goizean Katxalinek Bularreko Minbiziaren Nazioarteko Eguna dela-eta urtero antolatzen duen kanpaina. Kanpaina honen mugarriak urriaren 17tik 25era bitartean izango dira, bularreko minbiziari buruzko jardunaldi batekin urriaren 19an, eta urteroko Katxalin Martxa Solidarioa, modu birtualean egingo da urte berezi honetan, urriaren 17tik 25era bitartean. Aurtengo edizioan 25.000 km gainditu nahi dira eta, horrela, bularreko minbizia ikertzeko dirua biltzen jarraitu nahi da (https://katxalin.kinendu.com/).

Maite Peña diputatuak babesa adierazi dio Katxalin elkarteari, "atsedenik gabe" bularreko minbizia duten emakumeak "ikusarazteko, sentsibilizatzeko eta laguntzeko " lanean jarraitzen duelako. "Baita pandemiak markatutako garai nahasi hauetan ere. Katxalinek bere burua berrasmatzen eta bularreko minbiziak duten emakumeei babes osoa ematen jarraitzen du", adierazi du diputatuak. Gipuzkoako Foru Aldundiak urteak daramatza Katxalinekin elkarlanean: "Babes osoa ematen diogu bere proiektuari, eta hala egiten jarraituko dugu, prebentzioa eta laguntza sustatzen", gaineratu du, eta "urtero bezala" martxa solidarioan parte hartzeko deia egin die herritarrei, "minbiziaren aurkako borroka sakoneko lasterketa bat delako eta guztion inplikazioa behar duelako".

Diputatuaren hitzetan, Katxalinek egiten duen "lan bikaina" gaixotasunaren ikuspegi positiboagoa eskaintzean, prebentzioa bultzatzean eta emakumeen bizi-kalitatea hobetzean datza, informazio eta sentsibilizazio kanpainak eginez, emozioak kudeatzeko terapiak sustatuz, hala nola diagnostikatu berri diren emakumeei laguntza emanez. "Beharrezko laguntza eta ulermena eskaintzen diezue esperientzia berberetatik igaro diren emakumeei, bai eta haien familiari eta ingurukoei ere; lan hori txalogarria eta oso garrantzitsua da".

Bestalde, Mikel Sanchezek bere esker ona adierazi die bularreko minbizia duten emakumeen elkarteei, Katxalinen kasuan bezala. Bestalde, bularreko minbiziaren baheketen inguruan aritu da. 1995ean martxan jarri zutenetik aurtengo ekainera arte, Programak 2.742.181 zitazio baino gehiago eta 2.193.076 mamografia egin ditu, eta 10.392 minbizi hautematea ahalbidetu du, horietako gehienak aldi goiztiarretan. Gainera, % 83,6k bularraren tratamendu kontserbatzaile ez-inbaditzailea jaso zuen. Ehuneko hori urtez urte hazten ari da, eta hori urrats handia da.  Iaz, baheketa-programaren bidez 598 tumore berri hauteman zituzten.

Maite Vallek, bere aldetik, azaldu du aurtengo kanpaina bihar, urriak 17, hasiko dela, ohiko martxa solidarioarekin, "marea arrosa" ezagunarekin, hain zuzen ere. Helburua pertsona bakoitzak 5 km egitea da, 25.000 km-ra iritsi arte, Biodonostiari bularreko minbizia ikertzeko emango zaion dirua biltzeko. Izena emateko esteka hau erabil daiteke: https://katxalin.kinendu.com/, eta martxa birtuala urriaren 25ean amaituko da.

Era berean, Katxalinek balkoiak eta leihoak arrosa kolorez apaintzeko deia egin du, eta urtero bularreko minbiziaren inguruan antolatzen duen foroa streaming bidez jarraitu ahal izango da urriaren 19an, 18:00etan, honako helbide honen bidez: https://www.youtube.com/channel/UC8WGvN5c9b3BL.