CEL 's GOk Zumarragako mugikortasuna eraldatu du, gizarte- eta ingurumen-onurekin

Ekimen aitzindaria: CEL´s GO, TEK Zumarraga komunitate energetikoak abian jarria, Car Sharing zerbitzua eskaintzen die bere bazkideei, %100 elektrikoa den Renault ZOE batekin, udalerrian mugikortasun jasangarria sustatuz.

‘TEK Zumarraga’ Tokiko Komunitate Energetikoak beste urrats bat egin du jasangarritasunerantz, CEL´s GO modelo berritzailearen bidez. Auto partekatuaren eredua da, eta TEK Zumarragako bazkideei eskaintzen zaie. Ekimen hau Zumarragako Udalak Gipuzkoako Foru Aldundiko Jasangarritasun Departamentuarekin batera bultzatutako proiektu aitzindaria izateaz gain, komunitate jasangarriago eta arduratsuago bat garatzeko konpromisoa ere bada.

Ibilgailuaren aurkezpena erakundeetako ordezkariak bildu dituen ekitaldi batean egin da. Jose Ignacio Asensio Jasangarritasuneko foru diputatuak, Mikel Serrano Zumarragako alkateak eta Javier Zuazola Edinorreko zuzendari komertzialak ekimen honen garrantzia azpimarratu dute, bai TEKeko bazkideentzat, bai udalerri osoarentzat.

Jose Ignacio Asensio Jasangarritasun diputatuaren hitzetan, “CEL’s GO proiektuak Zumarragako eredu aitzindaria indartzen du, non gizarte, ingurumen eta ekonomia onurak herritarrentzako errealitate bihurtzen diren. Ekimen hori urrats sendoa da garraioaren karbonogabetzerantz, eta erakusten du trantsizio energetiko justu batek nola ekar dezakeen dirua aurreztea, emisioak murriztea eta bizi-kalitatea hobetzea. Mugikortasun elektriko partekatuaren aldeko apustua egiteak erregai fosilen erabilera murrizteaz gain, Zumarraga garbiagoa lortzen laguntzen du, aire osasungarriagoa eta auzokide guztientzako ongizate nabaria duena”.

Ekitaldian, ibilgailua aurkeztu da, %100 elektrikoa, Renault ZOE E-TECH bat, eta zerbitzuaren funtzionamendua ere azaldu da. Zerbitzu horri esker, erabiltzaileek hainbat kudeaketa egin ahal izango dituzte, erreserba egitetik hasi eta ibilgailua ireki eta itxi arte, CEL´s GO izeneko aplikazio esklusibo baten bidez.

Mugikortasun partekatuaren proiektuak abantaila ugari eskaintzen ditu, bai bazkideentzat, bai Zumarragako komunitatearentzat. Auto elektriko bat malgutasunez eskuratzeko aukera ematen duenez, mugikortasun-aukera jasangarriagoa sustatzen da, eta horrek ibilgailu partikularrekiko mendekotasuna murrizten laguntzen du. Ekimen hori ez da soilik garraiorako irtenbide praktiko bat, baizik eta onura ekonomiko eta ingurumen-onura esanguratsuak ere badakartza.

Ibilgailua doan kargatu ahal izango da Zelai Aristi aparkalekuan dagoen TEKeko elektrolindegian, Udalak utzitako leku batean. Horrek are gehiago errazten du zerbitzuaren erabilera, eta indartu egiten du TEKek mugikortasun jasangarriarekin duen konpromisoa.

Partekatutako auto bakar batek hamar ibilgailu pribatu ordezka ditzake, eta horrek kaleetako auto-pilaketak murrizten eta ingurumen-inpaktua minimizatzen laguntzen du. Gainera, zerbitzu hau aukeratzen duten bazkideek erregai eta mantentze gastuetan aurrezpen handia izango dute, eta horrek CEL’s Go aukera erakargarri eta arduratsua egiten du.

Ekimen horrekin, TEK Zumarraga erreferente bihurtu da energia-komunitateen nazio-eremuan. Gaur egun, 200 familia eta denda txiki baino gehiago ditu, eta % 100 berriztagarria den energia autokontsumitzen dute, udalerrian dauden 5 instalazio fotovoltaikoei esker. Horietako batek biltegiratzea du, eta, orain, mugikortasun jasangarri eta partekatuko eredu berri hau gehitzen zaio.