Dohaintza jasangarria: Jasangarritasun Departamentuak mila poltsa birziklatu baino gehiago eman dizkio Gipuzkoako Elikagaien Bankuari

Jasangarritasunaren eta konpromiso sozialaren aldeko keinu batean, Gipuzkoako Foru Aldundiko Jasangarritasun Departamentuak, Zinemaldiarekin, Emaús Gizarte Fundazioarekin eta “SpanSet” enpresarekin batera, mila poltsa birziklatu eta birziklagarri baino gehiago eman dizkio Gipuzkoako Elikagai Bankuari, Donostiako Zinemaldiko alfonbra gorrian erabilitako moketa oinarri hartuta.

Poltsa % 100 birziklatu eta birziklagarri hauek kalteberatasun-egoeran dauden pertsonen gizarteratzearen bidez egin dira, eta Donostiako Zinemaldiko alfonbra gorrian erabilitako moketan eta kamioiak lotzeko zintetan oinarrituta egin dituzte Emaús Gizarte Fundazioa eta “SpanSet” Gipuzkoako enpresek.

Era berean, Gipuzkoako Elikagai Bankuak behar duten pertsonei produktuak banatzeko euskarri gisa erabiliko dira.

José Ignacio Asensio: "Ekimen hau mugarri garrantzitsua da Gipuzkoan praktika jasangarri eta solidarioak bultzatzeko gure bilaketan. Ekonomia zirkularrak elkartasunarekin bat egin dezakeela erakusten duen adibide argia da, behar handiena dutenei mesede egiteko".

Joan den irailean, Gipuzkoako Foru Aldundiko Jasangarritasun Departamentuak eta Zinemaldiak jakinarazi zuten Donostiako Zinemaldiaren hirurogeita hamaikagarren edizioan 1.840 metro karratu moketa birziklatu eta birziklagarri erabiliko zirela, hirugarren urtez jarraian. Moketa hau Kursaalaren, Maria Cristina Hotelaren eta Victoria Eugenia Antzokiaren alfonbra gorrian erabili zen.

Duela gutxi, Emaús Gizarte Fundazioak alfonbra gorri hori birziklatu du. Alfonbra gorriaren heldulekuak Villabonako “SpanSet” enpresak egin ditu, kamioiak lotzeko zintak oinarri hartuta. % 100 birziklatutako mila poltsa baino gehiago material horrekin fabrikatu dira, eta Gipuzkoako Foru Aldundiko Jasangarritasun Departamentuak Oiartzunen dagoen Gipuzkoako Elikagai Bankuari eman dizkio. Poltsa horiek behar duten pertsonei banatutako produktuen euskarri gisa erabiliko dira.

Poltsak emateko ekitaldian izan dira José Ignacio Asensio Jasangarritasun diputatua, Belén Méndez de Vigo Gipuzkoako Elikagai Bankuko presidentea, José Luis Rebordinos Zinemaldiko zuzendaria eta Aitziber Zubillaga Emaús Gizarte Fundazioko zuzendari nagusia.

Ekitaldian, José Ignacio Asensio Jasangarritasun diputatuak azpimarratu duenez, "ekimen hau mugarri garrantzitsua da Gipuzkoan jardunbide jasangarri eta solidarioak bultzatzeko gure bilaketan. Donostiako Zinemaldiko alfonbra gorriaren moketa birziklatzean, helburu sozial bat betetzen dugu Elikagaien Bankuari lagunduz, eta argi eta garbi erakusten dugu Ekonomia Zirkularraren printzipioak arrakastaz aplikatu direla. Gure lurraldean balio-kate osoari eustea, fabrikaziotik susperraldira, funtsezkoa da eredu jasangarriago eta ingurumenarekiko errespetutsuago baterantz aurrera egitea". Amaitzeko, Elikagai Bankuaren konpromisoa eskertu nahi izan du diputatuak: "Eskerrak eman nahi dizkiet Gipuzkoako Elikagaien Bankuko boluntarioei eta horrelako proiektuak gure lurraldearentzat errealitate ukigarri bilakatzea ahalbidetzen duten enpresa, elkarte eta herritarrei".

Bestalde, Belén Méndez de Vigo Gipuzkoako Elikagaien Bankuko presidenteak eskertu egin du ekimen hau, “elikagaiak berreskuratzeko eta aprobetxatzeko helburuarekin bat egiten duelako erabat”. Méndez de Vigok azaldu duenez, “2023an, banaketa-kateen eta ekoizleen 1.050 tona elikagai xahutzea saihestu dugu, eta horrek eragin handia du ekonomian eta ingurumenean”.

Laburbilduz, alfonbra gorriaren moketak, poliesterrez fabrikatuta eta erabat birziklatuta dagoenak, bere bizi-zikloa osatu du, eta poliester-zuntz bihurtu da berriz ere. Zuntz hori Gipuzkoako Elikagai Bankuak emandako produktuetarako poltsak egiteko erabili da, ekonomia zirkularraren printzipioen adibide argiak emanez eta erabilgarritasun jasangarriko ziklo berri bat ahalbidetuz. Horretarako, Gipuzkoako Foru Aldundiko Jasangarritasun Departamentuak 17.000 euro bideratu ditu guztira.