Mugikortasuneko, Turismoko eta Lurralde Antolaketako Departamentuak E21 linea birkokatuko du Federico García Lorcan gelditzeari uzteko

Datorren astelehenetik aurrera, irailak 30, E21 lineak (Aeropuerto>Hondarribia>Donostia) ez du etenik izango Federico García Lorcan. Hala adierazi du Azahara Dominguez Mugikortasuneko, Turismoko eta Lurralde Antolaketako diputatuak, eta azaldu du bi erakundeei eragiten dieten mugikortasun-gaiak jorratzen dituen mahai teknikoak erabaki dituela aldaketa horiek.
Jakinarazi duenez, Donostiako Udalak, azkenean, Aldundiak E21eko geltokia aldatzeko egindako proposamena onartzea erabaki du (Aeropuerto>Hondarribia>Donostia). Geralekua Frantziako Pasealekuan kokatuko da, Iparraldeko Geltokiaren parean.

UK09 eta UK10
Era berean, Udalak UK09 (Zumaia>Orio>Donostia (AP-8) Askatasunaren etorbidean gelditzeko egindako proposamenari jarraituz, Aldundiak onartu egin du, baina aldaketa ez da gauzatuko Udalak Frantziako pasealekuan ere gelditzeko aukera emango duen baloratu arte, linea horren izaera intermodala ez galtzeko. Oraingoz, Udalaren proposamen irmorik ez dago UK10 linea (Zumaia>Donostia (AP-8 Zarauztik) birkokatzeko. 
"Gipuzkoan une historiko batean gaude garraio publikoaren erabilerari dagokionez, eta horrek esan nahi du administrazio eskudunok oso zorrotzak izan behar dugula zerbitzu publiko horren kudeaketan. Helburua ez da bakarrik erabiltzaileak irabazten jarraitzea eta gero eta jende gutxiago ibilgailu pribatua erabiltzea, baizik eta emandako zerbitzua herritarren beharretara egokitzeko. Mugikortasun jasangarria eskubideak bermatzen dituen eskubidea da, eta, beraz, zerbitzu jasangarri, eroso, seguru, irisgarri eta lehiakor baten aldeko apustua egiten jarraitu behar dugu, herritarrek beren bizitzako hainbat esparrutan egin beharreko joan-etorriak erraztuko dituena. Horrek esan nahi du Donostiara garraio publikoan iristen diren gipuzkoarrek hiriburuaren erdigunera iristeko aukera izan behar dutela, horrela bakarrik errazten baita intermodalitatea", adierazi diputatuak.