Emakumezkoen futbolak kirol munduan duen lekua aldarrikatzen du: nazioarteko lehen kongresua hasi da Ficoban

Emakumezkoen futbolak funtsezko urratsa eman du bere sendotzean, Irungo Ficoban Emakumezkoen Futbolaren Nazioarteko Lehen Kongresuaren hasierarekin. Gipuzkoako Foru Aldundiko Kirol Departamentuak bultzatutako ekimen honek kirol munduko ahots ugari bildu ditu: futbolariak, entrenatzaileak, medikuak, abokatuak, erakundeetako ordezkariak eta emakumezkoen futbolaren hazkundearekin eta garapenarekin konprometitutako beste profesional batzuk.

Irekiera ekitaldian Goizane Álvarez Gipuzkoako Foru Aldundiko Kultura eta Kirol diputatuak eta Nuria Alzaga Irungo alkateordeak parte hartu dute. Alvarezek adierazi duenez, "gaur Emakumezkoen Futbolaren Nazioarteko Lehen Kongresua inauguratuko dugu Irunen, kirolean berdintasuna lortzeko hausnarketarako eta eztabaidarako gunea. Bi urteko lanaren emaitza den kongresu honek desberdintasunak iraunarazten dituzten egiturak zalantzan jartzea eta emakumeak futbolean erabat balioetsiko dituzten paradigma berriak eraikitzea du helburu. Emakumezkoen futbolak bere garapena mugatzen duten oztopo kulturalei, indarkeriei eta estereotipoei aurre egiten jarraitzen du. Diskriminazioa desagerraraziko duten estrategiak aplikatzeko unea da, baita sistema inklusiboagoak sustatzekoa ere.

Bestalde, Nuria Alzagak bere "harrotasun hirukoitza" adierazi du anfitrioi gisa, futboleko jokalari ohi gisa eta azken urteetako kirolaren aurrerapenaren lekuko gisa, eta kongresua etxean, Ficoban, Europatik sartzeko atean, egin izanagatik.

Lehen mahai-ingurua: Emakumezkoen futbolaren bilakaera Espainian

Espainiako emakumezkoen futbolaren bilakaeraren analisia izan da eguneko lehen mahai-inguruaren protagonista.

Ezin bestela izan, eztabaidaren puntu nagusietako bat Rubiales kasuaren ingurukoa izan da. F Ligako presidenteak, Beatriz Alvarezek, ondorio positiboak eta negatiboak izan zituela adierazi du. Positiboen artean, lizentzien kopuruak gora egin du, 100.000 izatera iritsi arte. Alde negatiboan, babesle jakin batzuen ihesa izan zen ondorioetako bat, ez baitzuten komunikabideen fokuan egon nahi izan. Baina, gogorarazi duenez, "Munduko Txapelketa horrek entzuleria zabalago baten jomugan jarri gintuen, eta bere itzalak izan bazituen ere, epe luzera une eraldatzailea izan zen”.

Ivana Andresek, Espainiako selekzioko kapitainak eta gaur egun Inter Milaneko jokalariak, futbolarien paper eraldatzailea nabarmendu du, zelai barruan eta kanpoan lider bezala. "Ez gara kirolariak bakarrik, erreferente bihurtu gara. Beharrezkoa izan denean ahotsa altxatu dugu, eta horrek aldaketarako eragile gisa kokatzen gaitu ".

Lehen mahai-inguruan Ana Álvarez Espainiako Futbol Federazioko emakumeen futboleko zuzendariak ere parte hartu du, eta lehia-egitura indartzearen garrantzia eta teknikarien funtsezko zeregina azpimarratu ditu. "Profesionalizazioa ez da taldeetan bakarrik gertatu behar, baita kidego teknikoetan ere. Emakumezkoen futbolaren berezitasunak ulertzen dituzten entrenatzaileak, prestatzaile fisikoak, analistak eta medikuak behar ditugu, jokalarien garapena beheko mailetatik eliteraino lagun dezaketenak ", adierazi du.

Bestalde, Carmen Arcek, nazioarteko lehen atezainak, "Kubalita" izenaz ezagunagoa denak, emakumezkoen futbolaren aurrerapenei buruz hausnartu du. Bere garaian futbolean jokatzen zoriontsu zirela gogoratu du, nahiz eta mediku-asegururik gabe egiten zuten, mutilengandik jasotako kamisetekin eta lurrezko zelaietan. Egindako bidea aitortzen du, hala ere, lortutako arrakastak eta talentu gazteen harrobi gero eta handiagoa izan arren, "engranajean funtzionatzen ez duen zerbait" dagoela uste du.

Maider Castillok, futbolari profesional ohiak, profesionalizazioan jarri du arreta. "Emakumezkoen futbola profesionalizaziorantz doa. Gero eta talde tekniko handiagoak daude, nutrizionistekin, entrenatzaile pertsonalekin... Baina egia da, halaber, alde handiak daudela klub batzuen eta besteen artean. Talde batzuek hegazkinez egiten dituzte bidaia guztiak, eta beste batzuek autobusez; klub batzuek oso talde tekniko zabalak dituzte, eta beste batzuek funtzio anitzeko langileak dituzte ", azaldu zuen.

Erakundeen arteko lankidetzaren beharra ere azpimarratu du Castillok: "Azken batean, emakumeen futbolak erakundeen arteko gerra gutxiago behar ditu. Tristeena da azkenean horrek guztiak azken helburutik aldentzen duela, eta helburu horrek kirolaren garapena eta sendotzea izan beharko lukeela ".

Esku-hartzeetatik helburu argiak sortu dira emakumezkoen futbolaren etorkizunerako: telebistako audientziak hobetzea, estadioetara bertaratzea areagotzea eta emakumezkoen futbola kudeatzen duten erakundeen profesionalizazioa sendotzea. Profesionalizazioak talde eta kidego teknikoetatik hasi eta administrazio-inguruneetaraino heldu behar du, kirolaren hazkunde iraunkorra bermatuko duen ikuspegi estrategikoarekin.

Gaur eta bihar Ficoban egingo den Emakumezkoen Futbolaren Nazioarteko Kongresuaren lehen jardunaldian Eva Ferrer doktoreak hartu du parte, eta Ficobako auditorioan emakumezkoen futbolean lesioak izateko arriskuaren faktoreak aztertu ditu.

Kirol-medikuntzan espezialista gisa egindako ibilbide zabaletik, lesioa duen pertsonarengan jarri du arreta, lesioan bertan egin beharrean. Adierazi du, halaber, emakumeen fisiologiak lesio-arriskuan eragiten duela. "Argitalpenen arabera, obulaziotik gertu dauden uneek arrisku handiagoa dute emakume kirolarientzat lesioak izateko. Hilekoaren zikloak eragina du. Nire lana fase horietan lesio-arriskua murriztea da.