Ezkio-Itsasoko Udalak eta Gipuzkoako Foru Aldundiak Argindegi eraikineko etxebizitza bat egokitu dute Harrera Etxe izateko

Gipuzkoako Foru Aldundiak eta Ezkio-Itsasoko Udalak Argindegi eraikinean egokitutako etxebizitza inauguratu dute gaur, larrialdi egoera batean etxebizitzarik gabe geratzen diren udalerriko pertsona edo familiei aldi baterako harrera gune bat eskaintzeko birgaituta.

Baliabide hau zuzendua dago: Udalak berehalako hondamendi egoeran izendatutako etxebizitzetan bizi diren familia edo pertsonei, etxera itzultzea eragozten dien sute edo uholde bat bizi dutenei, tratu txar fisiko eta/edo psikologikoen biktima direnei, edo gizarte-zerbitzuen batzordeak balioetsitako beste kalteberatasun-egoeran daudenei.

Eraikina familia-unitate bat edo hiru pertsona independente hartzeko diseinatu da. Etxebizitzaren egokitzapenak 150.586,46 euroko aurrekontua izan du, eta horietatik 110.000 euro Gipuzkoako Foru Aldundiak bideratu ditu.

Etxebizitza berri honen inaugurazioan izan dira Ezkio-Itsasoko alkatea den Joseba Telleria, Haurren Babeseko, Gizarte Inklusioko eta Emakumeen aurkako Indarkeria Matxistaren Arretako zuzendaria den Belen Larrion, eta Nekazaritzako eta Lurralde Orekako foru-zuzendari eta landa-eremuko koordinatzaile den Arantxa Ariztimuño.

Ezkio-Itsasoko alkateak eskerrak eman ondoren etorritako Gipuzkoako Foru Aldundiko bi ordezkariei, eta bertaratu diren herritarrei, azpimarratu du Gipuzkoako Foru Aldundiak emandako diru laguntza, eta proiektua hau aurrera ateratzeko izandako ekarlana.

Gipuzkoako Foru Aldundiak udalerri txikiekin duen konpromisoa berretsi du gaur, oinarrizko beharrizanak asetzen lagunduz eta herritarren ongizatea, kohesioa eta bizi-kalitatea bermatuko duten zerbitzu publikoak emanez. Ildo horretan, laguntza-sareak garatzea funtsezkoa da komunitate horien ezinbesteko premiei erantzun eraginkorra emateko: "Argindegi eraikineko etxebizitzako harrera etxea Ezkion inauguratzea estrategia horren adibide garbia da, ongizatea bermatzen duen eta larrialdi-egoeretan berehalako konponbidea ematen duen harrera-etxebizitza bat ziurtatzen baitu".

Baliabide berri honek Gipuzkoako Foru Aldundiaren helburuetako bat berresten du, udalerri txikietan laguntza-sarea indartuz, eta larrialdi egoeren aurrean pertsona edo familien segurtasuna eta babesa ziurtatuz. Gainera, halako baliabideek gizarte-kohesioa eta erresilientzia komunitarioa sendotzen laguntzen dute, biak ere funtsezkoak Gipuzkoako lurralde osoaren garapen iraunkorra eta ekitatiboa garatzeko.