Gipuzkoa etorkizun jasangarriaren alde mobilizatuko da Hondakinen Prebentziorako Europako Astean

Edizio honetako nobedade nagusia, Emakumeak eta Jasangarritasuna Ekonomia Zirkularrean saria da. Sari horren bidez, ekonomia zirkularraren esparruan proiektu berritzaileak bultzatzen dituzten lidergo-postuetan dauden emakumeen lana ikusarazi nahi da.

José Ignacio Asensio: “Gipuzkoak jasangarritasunarekin duen konpromisoa hondakinen kudeaketatik harago doa; berrerabilpena lehenetsiko duen, alferrik galtzea murriztuko duen eta gure gizartearentzat eta ingurumenarentzat etorkizun bidezkoagoa sustatuko duen ekonomia zirkularraren aldeko apustua egiten dugu”.

Jasangarritasuneko diputatu José Ignacio Asensiok Hondakinen Prebentziorako Europako Astearen hamaseigarren edizioa aurkeztu du gaur. Aurten azaroaren 16tik 24ra egingo da, "Gustu ona ez da alferri galtzen" lelopean. Oraingoan, Prebentzio Astea nagusiki birziklatzearen industria bultzatzean eta elikagaien hondakinak birbanatzean oinarrituko da, ikuspegi sozialarekin. Gipuzkoako Foru Aldundiko Jasangarritasun Departamentua da herritarren, erakundeen, eskolen, enpresen, unibertsitateen, zentro teknologikoen eta lurraldeko gizarte-erakundeen baterako ahaleginaren buru, Gipuzkoak hondakinen prebentzioaren alde aspaldi egin duen lanaren berri emateko.

“Hondakinen kudeaketa jasangarria guztion erronka da, eta berebiziko garrantzia du Gipuzkoaren etorkizunerako”, adierazi du José Ignacio Asensio Jasangarritasuneko diputatuak. “Jasangarritasun Departamentutik konpromisoa hartzen dugu hondakinen sorrera ahalik eta gehien murrizteko eta hondakinak baliabide bihurtuko dituen ekonomia zirkularra sustatzeko, berrerabilera, birziklapena eta kontsumo arduratsua bezalako praktikak sustatuz. Ekintza bakoitzak, txikia badirudi ere, gure ingurumen-inpaktua murrizten laguntzen du, eta garapen-eredu bidezkoago eta planetarekiko errespetutsuago batera hurbiltzen gaitu”.

Elikagai-hondakinak: Hondakinak Prebenitzeko 2024ko Europako Astearen ardatz nagusia

Aurtengo edizioak elikagaiak alferrik galtzea du ardatz, ingurumenean eta gizartean duen eragina nabarmenduz eta arazo hori minimizatuko duten jardunbide jasangarriak sustatuz. Horri dagokionez, Jasangarritasuneko diputatu José Ignacio Asensiok adierazi duenez, “elikagaien xahuketa da Gipuzkoako ingurumen- eta gizarte-erronka nagusietako bat. Urtero, lurraldean 127.000 tona elikagai-hondakin inguru sortzen dira, eta kopuru horrek kontraste dramatikoa egiten du Elikagaien Bankuaren mende dauden 20.000 pertsonen errealitatearekin, haien oinarrizko premiak asetzeko. Paradoxa horrek agerian uzten du elikagaien kudeaketan jasangarriak diren jardunbideak sustatzeko premia, bai eta xahuketa murriztearen eta baliabideak modu ekitatibo eta eraginkorrean birbanatzearen garrantziari buruzko kontzientzia soziala sustatzeko premia ere”.

Ekintza horien esparruan, «Gastronomia jasangarrirantz: berrikuntza eta lankidetza ekintzan» Tabakalerako LABe-an jardunaldia egingo da. Ekitaldi horretan, adituak bilduko dira, elikadura-sistema jasangarriago bateranzko trantsizioan lankidetzak duen garrantziari buruz eztabaidatzeko, hubek eta living labek berrikuntzan eta ezagutzaren transferentzian duten zereginari helduz.

Gainera, Gipuzkoako Foru Aldundiak Basque Culinary Center-ekin eta Mahaia kolektiboarekin batera antolatutako Afari Solidario eta Jasangarriaren laugarren edizioa egingo da. Afari horrek ekoizpen ekologikoan, 0 km-an eta elikagaien xahuketa prebenitzean oinarritutako ikuspegia du, eta Gipuzkoako Elikagai Bankuari bideratuko dio diru-bilketa. Oraingo honetan, DANAk Valentzian berriki eragindako hondamendia dela eta, Elikagaien Bankuak afarian bildutako diruaren zati bat erabiliko du kaltetutako pertsonei laguntzeko.

Hondakinak gutxitzeko konpromisoaren barruan, Gipuzkoako Elikagai Bankuaren "Azken Minutua" programan laguntzen duten enpresei aintzatespen-ekitaldi bat egingo zaie, elikagaiak birbanatzen eta alferrik galtzearen aurka borrokatzen laguntzen baitute.

Ehunak eta tamaina handiko hondakinak berrerabiltzea: jasangarritasunarekiko konpromisoa

Berrerabiltzea eta birziklatzea funtsezko alderdiak dira Jasangarritasun Departamentuaren estrategietan. Aste honetan, Emaús Gizarte Fundazioak eta Koopera Servicios Ambientales sozietateak ate irekien jardunaldiak antolatuko dituzte Errenterian eta Urnietan ehunkiak, tamaina handiko hondakinak eta aparatu elektrikoak tratatzeko dituzten instalazioetan. Bisita gidatu horiei esker, jendeak lehen eskutik ezagutu ahal izango ditu berrerabilpen-, konponketa- eta birziklatze-prozesuak, eta jarduera horiek gizartean eta ingurumenean duten eragina ulertu ahal izango dute, enplegu inklusiboa sortzen baitute gizarte-bazterketako arriskuan dauden pertsonentzat.

Moda Jasangarriaren IX. Desfilea Naturkliman egingo da, eta Gipuzkoako saltoki txikiek parte hartuko dute lehen aldiz, "GK Green Fashion" klusterraren diseinatzaileekin batera, bigarren eskuko moda-proposamenak aurkezteko eta jantziak berrerabiltzeko. Desfile horrek moda zirkularrarekiko eta jasangarritasunarekiko konpromisoa azpimarratzen du, jendeari moda arduratsua eguneroko bizitzan nola txerta daitekeen erakutsiz.

Ekonomia zirkularra: berrikuntza-adibideak Gipuzkoan

Ekonomia zirkularra funtsezko zutabea da jasangarritasun-politiketan, eta Okendo plazan jarriko den "GK Recycling" karpan islatuko da. Klusterreko enpresek erakutsiko dute etxean bildutako hondakinak produktu eta material berri bihur daitezkeela, eta hondakinak baliabide baliotsu gisa tratatzearen garrantzia nabarmenduko dute. Karpa 11:00etatik 19:00etara egongo da zabalik.

Jarduera horiek osatuz, Gipuzkoako Lanbide Heziketako ikastetxeetako ikasleek Ekonomia zirkularra modelatuz erakusketan aurkeztuko dituzte beren lanak. Bertan, birziklatzeari eta jasangarritasunari buruz duten ikuspegia islatuko dute eskultura berritzaileen bidez.

Emakumeak eta Jasangarritasuna Ekonomia Zirkularrean sariak: emakumeen lidergoa ikusaraziz

Edizio honetako berritasun gisa, Emakumeak eta Jasangarritasuna Ekonomia Zirkularrean sariak emango dira. Sari horien bidez, ekonomia zirkularraren esparruan proiektu berritzaileak bultzatu dituzten zuzendaritza-postuetan lider diren emakumeak aitortu eta ikusarazi nahi dira. Ekimen horrek emakumeen lidergoaren garrantzia azpimarratzen du ekoizpen- eta kontsumo-eredu jasangarriagoetaranzko trantsizioan, tradizioz gizonak nagusi izan diren sektore batean duten eginkizuna eta etorkizun jasangarriago baten garapenari egiten dioten ekarpena nabarmenduz.