Gipuzkoako Eraldaketa Energetikoaren Bulegoak eskualdeko agentziekin indarrak batu ditu lurraldearen eraldaketa energetikoa bizkortzeko

Gipuzkoako Eraldaketa Enaergetikoaren Bulegoak aholkularitza pertsonalizatua eta laguntza teknikoa eskaintzen ditu autokontsumo-proiektuak bultzatzeko eta herritarrek trantsizio energetikoan duten parte-hartzea indartzeko.

José Ignacio Asensio: “Eraldaketa Energetikoaren Bulegoaren sorrerarekin, aurrerapauso erabakigarria eman dugu etorkizun energetiko jasangarriago eta bidezkoago baterantz. Energia-komunitateen hazkunde esponentzialak argi erakusten du herritarrak trantsizio energetikoarekin konprometituta daudela. Tokiko mailan autokontsumoa eta energia berriztagarriaren sorrera sustatzen ari garenez, gure mendekotasun energetikoa murrizten ari gara, klima-aldaketa arinduz eta sektorean enplegu-aukerak sortzeko ahalmena emango digun sare ekonomiko erresilienteagoa sortuz”.

Gipuzkoako Foru Aldundiko Jasangarritasun Departamentuak Gipuzkoako Energia Jasangarriaren eta Pobrezia Energetikoaren Lurralde Mahaia bildu du gaur goizean, eskualdeko agentziei Gipuzkoako Eraldaketa Energetikoaren Bulego berria aurkezteko. Hori dela eta, informazio-jardunaldi bat egin da lurraldeko eskualde agentzientzat, bulegoaren zerbitzuak Gipuzkoako trantsizio energetikoan funtsezkoak diren erakunde horietara hurbiltzeko. Ekitaldian, diputatu nagusiorde eta Jasangarritasuneko diputatu José Ignacio Asensio izan da eta energia bulegoaren jardueraren lehen hilabeteetan lortutako emaitzak aurkeztu dira, 2024ko ekainean sortu zenetik. Datozen hilabeteetarako aurreikusitako jarduera-ildoak azaldu dira ere.

Bileran izan dira Gipuzkoako eskualde-agentzia nagusietako ordezkariak, besteak beste: Aizpea Otaegi, Oarsoaldea eskualdeko garapen agentziako presidentea; Nuria Alzaga, Bidasoa Birizik garapen agentziako presidentea; Ion Arozena, Urola Kostako Mankomunitateko presidentea; Alaitz Labaien, Tolosaldea Garatzen garapen agentziako presidenteordea; Juan Ángel Balbás, Debegesa eskualdeko garapen-agentziako zuzendari nagusia; eta Helena del Río, Beterri Buruntzako Mankomunitateko zuzendaria; Itziar Salaberria, Uggasako gerentea; Koldo Azkoitia, Debagoieneko garapen agentziako arduraduna; Imanol Arrizabalaga, Urola Erdiko Energia Mahaiaren kidea; eta Maialen Sánchez, Goiekiko Energia teknikaria, besteak beste. Jasangarritasun Departamentuak lurraldearen eraldaketa energetikoan duen bultzada azpimarratu da, bai eta erakundeen arteko lankidetzaren garrantzia ere, energia-komunitateen garapenean modu eraginkorrean aurrera egiteko.

Abian jarri zenetik, energia bulegoa erreferente bat da herritarrei eta tokiko erakundeei aholkularitza eta laguntza emateko energia-komunitateak sortzen eta finkatzen, funtsezkoak baitira energia berriztagarriak sortzeko eta lurraldean autokontsumoa egiteko. Ahalegin horri esker, Gipuzkoak 60 energia-komunitate aktibo ditu gaur egun; horietatik 55 herritarrak dira, eta 5 industrialak, 10.000 familia inguru hornitzen dituztenak, 55 udalerritan banatuta.

Datu horiek erakusten dute 2020an lehen energia-komunitatea sortu zenetik hazkunde esanguratsua izan dela, eta Gipuzkoa erreferente bihurtu dela trantsizio energetikoan. Komunitate horiek 9,9 milioi kWh sortzeko ahalmen instalatua dute urtean, eta horri esker, 42 tona CO₂ isurtzea saihestu da, hau da, urtean 1.682 zuhaitz landatzea. Aurrerapen esanguratsua klima-aldaketaren eta lurraldearen mendekotasun energetikoaren aurkako borrokan. Gainera, parte hartzen duten familiek % 25 eta % 30 arteko aurrezpena lortzen dute energia-fakturan.

Horri dagokionez, José Ignacio Asensio diputatu nagusiordeak adierazi duenez, “energia-komunitateak ikaragarri ugaritu egin dira gure lurraldean. Honek erakusten du kultura energetiko berri bateranzko aldaketa hasi dela eta geldiezina dela egiaztatzea da”. Era berean, foru-arduradunak azpimarratu duenez, “energia bulegoa sortuta, aurrerapauso erabakigarria eman dugu etorkizun energetiko jasangarriago eta bidezkoago baterantz. Energia-komunitateen hazkunde esponentzialak argi erakusten du herritarrak trantsizio energetikoarekin konprometituta daudela. Tokiko mailan autokontsumoa eta energia berriztagarriaren sorrera sustatzen ari garenez, gure mendekotasun energetikoa murrizten ari gara, klima-aldaketa arinduz eta sektorean enplegu-aukerak sortzeko ahalmena emango digun sare ekonomiko erresilienteagoa sortuz”.

Hasierako emaitzak: aholkularitza-zerbitzu giltzarria

2024ko ekainetik irailera bitartean, energia-komunitateen sorrerarekin edo garapenarekin lotutako 43 kontsultari erantzun die energia bulegoak, eta autokontsumo-proiektuak sustatzeko interesa duten enpresa txiki eta ertainak, tokiko erakundeak eta pertsona fisikoak hartu ditu barnean.

Jarduera garrantzitsuenen artean, honako hauek daude:

• Informazioa eta aholkularitza: 106 aholkularitza-jarduera baino gehiago egin dira, arlo juridiko, ekonomiko, tekniko, sozial eta administratiboetan. Testuinguru horretan, informazioa eman zaie 10 ETEri, 17 toki-erakunderi eta mugimendu horretan parte hartu nahi duten 13 pertsona fisikori.
• Proiektuei laguntzea: Guztira 15 jarduera egin dira tokiko energia-komunitateei laguntzeko, batez ere 5.000 biztanletik beherako udalerri txikietan.

2024rako ekimen berriak

Energia bulegoak ekimen berriak jarri ditu abian, Gipuzkoako energia-eraldaketan herritarren parte-hartzea sustatzen jarraitzeko. Aurreikusitako jardueren artean, honako hauek nabarmentzen dira:

• Instalazio fotovoltaikoak eta energia-komunitateetako ibilgailu elektrikoak kargatzeko puntuak denbora errealean monitorizatzea.
• Gipuzkoako Energia Komunitateen Lehen Foroa antolatzea, urriaren amaierarako aurreikusia. Foro horretan esperientziak partekatuko dira eta energia-komunitateen sorkuntza- eta kudeaketa-prozesuen hobekuntza bultzatuko da.

Ekimen horiekin, energia bulegoak herritarrak ahalduntzeko eta lurraldearen energia-kulturan aldaketa sustatzeko konpromisoa indartzen du, energia garbiak, tokikoak eta jasangarriak eskuratzea erraztuz. Eskualdeko agentziek, eragile estrategikoak diren aldetik, funtsezko zeregina dute proiektu horien hedapenean eta tokiko baliabide eta eragileen mobilizazioan, eredu energetiko jasangarriago eta sozialki bidezkoago baterantz aurrera egiteko.