Ingurumeneko Departamentua hondakinen Plan berri bat (GHHKPO 2019-2030) izapidetzen hasi da

Foru arau berriaren helburua da ekonomia zirkularra, prebentzioa eta klima aldaketaren aurkako borroka sustatzea Gipuzkoan, arlo horretan Europan ezarrita dauden helburuak txertatuz. Izapidetzeak 9 hilabete iraungo du, eta administrazioei, talde politikoei eta gizarte eragileei parte hartzeko aukera emango zaie.

 

José Ignacio Asensio: “Plan berriak (GHHKPO 2019-2030) hondakinen birziklatzearen eta balorizazioaren zirkulua itxiko du, eta Gipuzkoa prest utziko du ekonomia zirkularraren eta klima aldaketaren erronkari aurre egiteko”. “Lehenengo aldiz, Gipuzkoak hondakinen plan bati helduko dio Europako herrialde garatuenen baldintza beretan”

 

Gipuzkoako Ingurumen Guneko lehen eta bigarren faseetako lanak esleitu eta abian jarri ondoren, zeintzuk datorren urteko uda hasierako amaitzekoak diren, Ingurumen Departamentua hondakinen plan berri bat izapidetzen hasi da, GHHKPO 2019-2030 izenekoa. Foru arau berriak ezarriko ditu lurraldearen helburuak arlo horretan, beti ere lehenengo GHHKPOk (7/2008 FA) bere garaian zehaztutakoak lortu ondoren eta plangintza agiri hartan aurreikusitako azpiegitura guztiak osatu ondoren; eta Gipuzkoako Batzar Nagusien onespena jaso beharko du.

 

Jose Ignacio Asensio Ingurumeneko diputatuak adierazi du Gipuzkoako Hiri Hondakinen Kudeaketa Plan Orokor berria (GHHKPO 2019-2030) onartzeko izapideak abian jartzeak esan nahi duela “zirkulu bat ixtea Gipuzkoako hondakinentzat inolako konponbide eta hautabiderik gabe hasi zen legealdi batean, eta legealdi horri amaiera ematea martxan egongo den Ingurumen Gune batekin eta Gipuzkoa ekonomia zirkularraren eta klima aldaketaren helburuak betetzeko prest jarriko duen hondakinen plan berri batekin”. Foru arduradunak esan du jauzi kualitatibo handi bat dela, izan ere plan berriari esker “lehenengo aldiz, Gipuzkoak hondakinen plan bati helduko dio Europako herrialde garatuenen baldintza beretan”.

 

Prozesuari hasiera emateko, eskumena duten administrazio guztiei (udalak, mankomunitateak, interesa duen publikoa eta Eusko Jaurlaritza) aurretiazko dokumentu bat bidaliko zaie beren ekarpenak egin diezazkioten, eta Ingurumen Departamentuak kontuan hartuko ditu aurreproiektua prestatzerakoan. Horrekin batera, herritarrek parte hartzeko protokolo bat zehaztuko da. Aurreproiektua prestatu ondoren, jendaurrean jarriko da eta interesdun guztiek alegazioak egin ahal izango dituzte; jarraian, hasiera emango zaio parte hartze prozesuari, aurreproiektu fasean onartutako protokoloan xedatutakoaren arabera, gizarte eragileei eta herritarrei plan berrian parte hartzeko aukera emateko, eta fase horrek bi hilabete iraungo du.  Plan berrirako osatu egin beharko dira hondakinen plangintzari buruzko edukiak, beste dokumentu batzuk aurkeztuz, besteak beste, Ingurumen Adierazpen Estrategikoa, Genero Eraginaren Ebaluazioa, txosten juridikoa eta txosten ekonomikoa. Eduki horiek Euskal Herriko Ingurumen Batzordearen eta Aholku Batzordearen ikus onespena jaso beharko dute.

 

Aurreko fase horiek guztiak gainditu ondoren, Diputatuen Kontseiluaren onarpenera jarriko da GHHKPO 2019-2030 plan berria, eta Gipuzkoako Batzar Nagusietara igorriko da, eztabaidatu eta onar dezaten. Aurreikuspenen arabera, prozesu horrek 9 hilabete iraungo luke eta datorren urteko otsailean amaituko litzateke. Onartuz gero, hondakinen plan berria izango da 2019-2030 aldian Gipuzkoako hondakinen plangintza eta kudeaketa arautuko duen Foru Araua.

 

Hondakinen plan berria izapidetzen hasiko da GHHKPOk bere garaian ezarri zituen helburuak bermatu ondoren, birziklapena %65eko tasan (2030) kokatuko duen azpiegitura sistema batetik eta birziklatu ezin diren hondakinen aprobetxamendu energetikoarekin. Modu horretan, Gipuzkoak lortuko du zabortegirik gabeko kudeaketa sistema bat ezartzea, sortzen dituen hondakin guztiak baliabide propioekin tratatzeko gai izango dena, eta ondorioz 0 zabor isurketa eragingo duena.  Egoera hau Departamentuak 2015ean aurkitu zuenaren oso bestelakoa da. Orduan, Gipuzkoan azpiegiturak falta ziren, zabortegiak itxita zeuden eta Gipuzkoako Hondakinen Kontsortzioa egoera larrian zegoen Zubietako Hondakinen Kudeaketa Zentroa geldiarazteak eragin zituen zorren ondorioz. Asensioren iritziz, aldaketa oso positiboa izan da, eta ondorengoa azpimarratu du “arauak betez lortu dugu konponbide aurreratua eta europarra ematea Gipuzkoako hondakinen gaiari; aldiz, EH-Bilduko aurreko gobernuaren ez betetzeak arazo larriak eragin zituen ekonomia eta ingurumen mailan, eta oraindik horiek ordaintzen ari gara”.

 

Hauek dira 2019-2030 Hiri Hondakinak Kudeatzeko Plan Orokorrean (GHHKPO 2) ezarritako helburuak: prebentzioa maximizatzea; gaikako bilketa eta birziklatzea ahalik eta gehien optimizatzea; konpostajean eta materia organikoaren biometanizazioan ahal den guztia aurreratzea; birziklatu ezin diren hondakin guztiak balorizatzea, eta lehen mailako hondakinen isuririk ez eragitea.