Jausoro: birika berde berri bat Azkoitirako, Gipuzkoako Borondatezko Karbono Funtsari esker

Gipuzkoako Borondatezko Karbono Funtsak 47.000 euroko finantzaketa eman dio proiektuari, eta jasangarritasunarekiko eta erresilientzia klimatikoarekiko konpromisoaren adibide gisa ireki ditu ateak, Azkoitiak ingurumena babesteko erreferente gisa duen zeregina indartuz.

José Ignacio Asensio: “Jausoro klima-babeslekua da naturgune degradatuak leheneratzeko eta balio ekologiko eta sozial handiko eremu bihurtzeko ahaleginak nola batu ditzakegun erakusten duen adibide bat”.

Azkoitiko herriak Jausoro klima-aterpea inauguratu du gaur. Azpiegitura berde berri hori klima-aldaketaren aurkako babes-gune bat eskaintzeko eta ingurumen-jasangarritasuna sustatzeko diseinatu da. Proiektu hori Naturklimaren Borondatezko Karbono Funtsaren bidez finantzatu da, 47.000 euroko aurrekontuarekin.

Inaugurazio-ekitaldian parte hartu dute José Ignacio Asensio Jasangarritasuneko diputatuak eta Naturklimako presidenteak, eta Ana Azkoitia Azkoitiko alkateak. Obra horrek ingurumen-berroneratzearen eta klima-aldaketaren aurkako borrokaren testuinguruan duen garrantzia nabarmendu dute.

Jausoro klima-babeslekua 18.790 m²-ko azaleran dago, baso mistoan eta aurrez degradatutako ibai-habitatetan, udalerria bizitegi-, industria- eta natura-eremuekin lotzen duen eremu estrategiko batean. Proiektuak ingurune hori azpiegitura berde bihurtu du, basoak berroneratuz, biodibertsitatea hobetuz eta herritarrentzat espazio irisgarri eta jasangarriak sortuz.

Bere hitzaldian, Asensiok nabarmendu duenez, “Jausoro klima-babeslekua da naturgune degradatuak leheneratzeko eta balio ekologiko eta sozial handiko eremu bihurtzeko ahaleginak nola batu ditzakegun erakusten duen adibide bat. Proiektu honek Azkoitiko herritarren bizi-kalitatea hobetzen du, eta klima-aldaketaren ondorioak arintzen ere laguntzen du, azkoitiar guztientzako etorkizun jasangarriagoa sustatuz”.

Bestalde, Ana Azkoitia alkatea pozik agertu da proiektuarekin: "Etengo ez diren eta egoeraren larritasuna agerian uzten duten gertaera meteorologiko kaltegarriak ikusten ari gara. Bakoitzak bere tokitik, klima-aldaketaren ondorio larriei aurre egiteko neurri posibleak hartu behar ditugu, eta Jausoroko klima-babeslekua testuinguru horretan kokatzen den ekimena da, herritarrentzat gune berde berritua".

Birnaturalizazioa eta jasangarritasuna

Egindako ekintzen artean daude egoera txarrean dauden espezie aloktonoak moztea, haien segurtasuna bermatzeko zuhaitzak inaustea eta espezie autoktonoak landatzea, hala nola haritzak, pagoak, haltzak eta sahatsak. Era berean, lurzorua landare-lurrez indartu da, karbonoa biltegiratzeko gaitasuna indartzeko. Gainera, zuhaitzen sustraiak errespetatzen dituzten lur egonkortuko bideak ezarri dira, bide irisgarriak sortuz eta ingurune naturalarekiko interakzioa sustatuz.

Klima-aldaketaren aurkako babesleku bat

Jausoro klima-aterpea espazio seguru eta erosoa izateko diseinatu da, herritarrek, batez ere biztanle kalteberenek, muturreko fenomeno klimatikoetatik babesteko aukera izan dezaten, hala nola bero-boladetatik. Aldi berean, ekosistemaren konektibitatea indartu da, ibaiko faunaren eta inguruko basoen arteko interakzioa erraztuz.