Mugikortasuneko, Turismoko eta Lurralde Antolaketako diputatu Azahara Dominguezek ‘Donostiaren oroigarra. Galarza argazki bilduma’, erakusketa bisitatzera gonbidatzen du San Telmo museoan

Mugikortasuneko, Turismoko eta Lurralde Antolaketako diputatu Azahara Dominguezek ‘Donostiaren oroigarri. Galarza Argazki Bilduma’ erakusketa ezagutzera gonbidatzen ditu hiritarrak. Erakusketa hau San Telmo museoan izango da datorren igandera arte, urtarrilak 26.
Diputatuak, Juantxo Marrero Donostiako Hiri Proiektuetako zinegotziarekin batera, XX. mendearen lehen erdiko Donostia zeharkatzen duten 140 argazki historikoen erakusketa ezagutzeko aukera izan du, Lola Horcajo eta Juanjo Fernández Beobide erakusketaren komisarioen eta Agurtzane Garai San Telmo Museoko jarduera eta proiektuen arduradunaren eskutik.
"Nondik gatozen jakiteko eta Donostia gaur egun ezagutzen dugun hiria izatera nola iritsi den ulertzeko aukera paregabea da. Gainera, mende hasieratik garraio publikoak, kasu honetan tranbiak eta trenbideak, herritarrentzat izan duen garrantzia ikus daiteke. Era berean, turismoak hiriaren bilakaeran eta garapenean izan duen ekarpena erakusten du", adierazi du Azahara Domínguezek.
Erakusketaren komisario Lola Horcajok azaltzen duenez, "Gregorio González Galarza argazkilaria eta bere semeak izan ziren Donostiako postalen editore nagusiak XX. mendearen lehen erdian, hiri eder, dotore eta etengabeko hirigintza-bilakaeran dagoen hiri baten ikuspegiak harrapatuz". "Bere argazkien negatiboen zati handi bat San Telmo Museoan gordetzen da, eta digitalizazioari eta formatu handira zabaltzeari esker, bere irudi oroigarriek aurreko belaunaldien Donostian barneratzeko aukera ematen digute, batzuentzat oroitzapen maitagarria eta askorentzat aurkikuntza preziatua izanik", gaineratu du.
"Erakusketak ibilbide bisual bat egiten du hirian zehar, Hiri Zaharraren inguruan hasita, Cortazar zabalgunetik eta Alderdi Ederreko lorategietatik jarraitzeko. Atal zabala eskaintzen zaio badiaren esparruari eta Kontxako eta Ondarretako hondartzei, beren pasealekuekin. Jarraian, Gros auzoa, Chofre zezen-plaza eta Kursaal zabalgunearen garapena ikus daitezke. Azkenik, hegoaldeko zabalgunean sartuko gara, Hiribidearen hegoaldean, eta Urumeatik gora jarraituko dugu, Amara Berrirantz eta Loiolarantz. Erakusketa-ibilbideak Ulia, Martutene eta Igeldoko jolas-parkeetara ere garamatza, eta, azkenean, XX. mende hasierako inauteri ikusgarrien lekuko izango gara, eta begirada euskal eszenak deituriko herrialdeko mota eta ohitura tradizionaletara zuzenduko dugu", nabarmendu du San Telmo museoak.
Horrek guztiak "hiriaren eta inguruaren eraldaketa ez ezik, bizimoduen bilakaera denboran zeharreko begirada batean ulertzea" ahalbidetzen du.
Erakusketa urtarrilaren 26ra arte bisitatu daiteke museoaren ohiko ordutegian. Bisita gidatua egin nahi izanez gero, astearteetan (10:30ean gaztelaniaz eta 18:00etan euskaraz) eta larunbatetan (10:30ean eta 18:00etan gaztelaniaz) antolatzen dira. Bisita doakoa da, baina museoko sarrera erosi behar da eta ezinbestekoa da aldez aurretik erreserba egitea.