Zinemaldiaren alfonbra gorria elikagaiak banatzeko mila poltsa birziklatuetan bihurtuko da

Jaialdia amaitutakoan, moketa gorria Gipuzkoako Elikagai Bankuari emango zaio, mila poltsa inguruen bidez, Elikagai Bankuak behar dutenei emandako produktuen euskarri gisa erabil ditzan.

José Ignacio Asensio: "Gipuzkoan, beste behin ere, erreferente gara iraunkortasunaren aldeko gure apustuan. Ekimen hori, ekonomia zirkularraren printzipioen aplikazioaren adibide izateaz gain, irismen handiko helburu sozial bat betetzen du, elikagaiak gehien behar duten pertsonen artean banatzean ".

Donostiako Zinemaldiaren 71. edizioa hasi aurretik eta hirugarren urtez jarraian, Gipuzkoako Foru Aldundiko Jasangarritasun Departamentuak Kursaal jauregiaren kanpoaldean eta Maria Cristina hoteletik Victoria Eugenia antzokiraino doan tartean, zeludoidearen munduko izarrak jasotzen dituen alfonbra gorriaren 1.840 m² moketa birziklatu eta birziklagarria jarriko ditu Zinemaldiaren esku.

Hala iragarri dute gaur goizean José Ignacio Asensio Jasangarritasuneko diputatuak eta José Luis Rebordinos Donostiako Nazioarteko Zinemaldiko zuzendariak. Bertan izan dira ere Carlos Martínez Gipuzkoako Elikagai Bankuko presidenteordea eta Begoña Cabaleiro Emaús Gizarte Fundazioko komunikazio arduraduna. Asensiok zorionak eman nahi izan dio Zinemaldiari "mundu osoan eragina duen ekitaldi batean jasangarritasunaren defentsaren alde egin duen apustu irmoagatik" eta azpimarratu duenez, "ekimen hau, ekonomia zirkularraren printzipioen aplikazioaren adibide izateaz gain, irismen handiko helburu sozial bat ere bada, elikagaiak gehien behar duten pertsonei banatzen baitizkie".

José Luis Rebordinos Zinemaldiko zuzendariak adierazi duenez, "Zinemaldiaren jasangarritasun-konpromisoaren barruan, zeina aurten garraioaren eta energiaren arloko neurri berrietan islatzen baita, garrantzitsua iruditzen zaigu, halaber, Zinemaldiaren objektu ikonikoetako batek, alfonbra gorriak, herritarrei birziklatzeko eta baliabideak aprobetxatzeko mezu argia helaraztea”.

Bestalde, Carlos Martínezek, Gipuzkoako Elikagaien Bankuko presidenteordeak, Gipuzkoako Elikagai Bankuaren jasangarritasunarekiko konpromisoa nabarmendu du. Izan ere, “GEBak konpromiso bat du egunero, soberakina bildu eta banatzeko eta zaborraren aurka borrokatzeko dugun programarekin”. Martínezen esanetan, “poltsa horiek baliagarriak dira gure lurraldeko pertsona ahulenak garrantzi eta ospe handiko kultura-ekitaldi batera hurbiltzeko”.

Zinemaldia amaitutakoan, moketa gorria Gipuzkoako Elikagai Bankuari emango zaio, mila poltsen bidez, Elikagai Bankuak behar dutenei emandako produktuen euskarri gisa erabil ditzan. Emaús Gizarte Fundazioaren Donostiako "Sin desperdicio" enpresa arduratuko da Zinemaldiko alfonbra gorriaren moketa birziklatzeaz eta poltsak fabrikatzeaz. Horretarako, Jasangarritasun Departamentuak 17.000 euro bideratu ditu guztira.

Zinemaldia 2020an hasi zen ingurumenaren aldetik jasangarriagoa den jaialdi baterako trantsizioa egiten. Hiru urte hauetan zehar, erakundeak hainbat neurri hartu ditu energiaren, mugikortasunaren, kontratazioen eta materialen erabileraren inguruan, karbono-aztarna murrizteko.

Zinemaldia, iaz, Gipuzkoako lehen erakundea izan zen karbono-aztarna konpentsatzen, Gipuzkoako Borondatezko Karbono Funtsaren bidez. Foru Aldundiko Jasangarritasun Departamentuak sustatu zuen funts hori. Lehen ekitaldi horretan, Zinemaldiak isurpenen erdia baino gehiago konpentsatu zuen, 2.841,81 tona CO₂ konpentsazioarekin eta 25.000 euroko diru-balioarekin.