Aldundiak 22 zehapen-espediente zabaldu dizkie Debako uxaldian parte hartu zuten ehiztariei

Gipuzkoako Foru Aldundiak 22 zehapen-espediente ireki dizkie abenduaren 17an Deban egindako basurde-uxaldian parte hartu zuten ehiztariei. Horren ondorioz, emakume bat hil zen tiroz, bere etxean zegoela. Xabier Arruti Lurralde Oreka Berdeko diputatuak Gipuzkoako Batzar Nagusietan xehetasunak eman ditu bere departamentua uxaldian parte hartu zuten ehiztariei izapidetzen ari zaizkien espedienteei buruz.

Ertzaintzaren txostena jaso ondoren, Aldundiak zehapen-espedienteak ireki dizkie uxaldian parte hartu zuten 22 ehiztariei, Ehizaren 2/2011 Legearen arabera, jarduera baimendutako eremutik kanpo egin dutelako, uxaldia herritarrentzako segurtasun eremu baten barruan egin dutelako, ikerketan gertatutakoaz bestelako informazioa eman dutelako eta pertsonen osotasuna arriskuan jarri dutelako.

Ehizaren 2/2011 Legearen arabera, Aldundiak ezarritako arau-hausteen kalifikazioa arina, larria edo oso larria izan daiteke, eta, beraz, ehiztari bakoitzak ordaindu beharreko kalte-ordaina, falta motaren arabera, 6.000 eurora irits daiteke oso larritzat kalifikatutako arau-hausteetan. Horrez gain, urtebete eta bost urte arteko eperako ehizarako debekua ere jaso dezakete.

Xabier Arrutik batzarkide-taldeei azaldu die espediente horiek izapidetzeko lankidetza estuan jardun direla Ertzaintzarekin eta Ehiza Federazioarekin. "Hiru erakundeen arteko lankidetzari esker, kuadrilla eta uxaldian parte hartu zutenak identifikatu ahal izan dira, eta argitu non zeuden, ehizaren momentuan zein ari zen tiro egiten eta nork egin zuen emakumea hil zuen tiroa". Arrutik gehitu duenez, gainera, "ikerketan zehar, Aldundiaren ehiza erregistroan kuadrillako kide gisa edo gonbidatu gisa izapidea egin gabe zegoen parte-hartzaile bat identifikatu da, eta izapide hau egitea nahitaezkoa da jarduera burutzeko; beraz, pertsona horri beste zehapen-espediente bat zabaldu zaio uxaldian baimen izendunik gabe parte hartzeagatik".

Neurri berriak

Espediente horiek izapidetzeaz gain, Gipuzkoako Foru Aldundiak iragarri du jarduera hori modu seguruan burutzen dela bermatzen jarraitzeko beste neurri batzuk jarriko dituela abian. Hala, informazio saioak egingo ditu Gipuzkoako kuadrilla guztiekin, Ehiza Federazioarekin lankidetzan, denboraldia hasi aurretik, ehiza protokoloa gogorarazteko. Era berean, Aldundiaren ehiza eta arrantza bisorea hobetuko da; bisore horri esker, denbora errealean ikus daitezke ehiza egiteko ezarritako perimetroetan burutzen ari diren uxaldiak, eta harremanetarako zenbaki bat jarriko da, herritarrentzat seguruak diren eremuetan egiten den ehiza jarduera salatzea errazteko.

Biktimarekiko elkartasuna

Azkenik, Lurralde Oreka Berdeko diputatuak elkartasuna adierazi dio hildako emakumearen familiari, eta azpimarratu duenez, "Aldundian lanean ari gara, eta lanean jarraituko dugu, eta zigorrak eta debekuak ezarriko ditugu, hala badagokio, Deban gertatutakoa bezalakorik berriz gerta ez dadin".