Aldundiak eta UIKak elkarrizketa-ziklo bat antolatu dute hausnartzeko eta herritarren parte-hartzea bultzatzeko

Gipuzkoako Foru Aldundiak eta UIK-ak, Euskal Herriko Unibertsitateko (UPV/EHU) Uda Ikastaroak Fundazioak, herritarren parte-hartzeari buruzko solasaldi zikloa antolatu dute 2023ko urtarrila eta martxoa bitartean, Gipuzkoako Eskola Irekiaren esparruan. Solasaldiak Azpeitian (San Agustin Kulturgunean) eta Donostian (Miramar Jauregia eta Okendo Kultur Etxean) egingo dira. Ekimena gaur aurkeztu da Donostian eta bertan izan dira Eider Mendoza, Gobernantzako foru diputatua; Itziar Alkorta, UIKako zuzendari akademikoa; eta Mikel Pagola, Herritarren Partaidetzarako foru zuzendaria. Parte hartzea doakoa izango da eta izena www.uik.eus webgunearen bidez emango da.
Sustatzaileek azaldu dutenez, hitzaldi irekiak eta publikoak izango dira parte hartzeko aukeretan, baldintzetan, eskubideetan eta betebeharretan eragina izan duten eta eragiten ari diren gakoei buruzkoak. Gipuzkoako egungo errealitatean eta testuinguru zehatzean parte-hartzean eragiten ari diren gakoetan elkarrekin pentsatzen eta hausnartzen hastea da helburu nagusia, ahalik eta modurik inklusiboenean. Ildo horretan, parte-hartzean esku hartzen duten hainbat eragileren kezkak eta ekarpenak bildu nahi dira, eta atzematen diren hutsuneetan eragiteko gomendioak, ideiak eta proiektuak sortu.

Ekimenaren bultzatzaileek gogorarazi dutenez, Gipuzkoako Foru Aldundiko Herritarren Partaidetzarako Zuzendaritzak eta UPV/EHUko Uda Ikastaroen Fundazioak lankidetza-hitzarmen bat sinatu zuten 2020an. Akordio honen helburua izan da uda ikastaroetan metodologia parte-hartzaileak txertatzea eta ezagutza-topaguneak sortzea, eta bi aldeek oso balorazio positiboa egin dute orain arte egindako lanaz, eta parte-hartzearen inguruan elkarrizketa irekia eta publikoa sortzera bultzatu ditu. Hausnarketa horretatik abiatuta, bi eragileen arteko hitzarmenaren funtsa berritzea eta aberastea erabaki da, eta aurkeztu den ekimena lankidetzan abiaraztea erabaki da. Bi erakundeen arteko 2023-2025 aldirako hitzarmenak, gainera, UIK programaren garrantzi sozial bereziko ikastaroetan parte hartzeko metodologietako adituen lankidetzari helduko dio, eta prozesu espezifiko bat diseinatuko da gainerako programazioan pixkanaka parte hartzea sustatzeko.

Hiru saioak
Lehenengo elkarrizketa urtarrilaren 26an izango da, 16.00etatik 19.30era, Azpeitiko San Agustin aretoan. “Nahi izatea” izenburuko topaketa honek parte hartzeko beharrezkoak diren motibazio eta konfiantzan sakonduko du. Parte hartzeko borondatean eta motibazioan zer gakok eragiten duten, zerk laguntzen edo errazten duen eta parte-hartzea gauzatzea zerk zailtzen duen dira, besteak beste, topaketan landuko diren galderetako batzuk.

Bestalde, egun osoko jardunaldia antolatu da bigarren saiorako, Donostiako Miramar Jauregian, otsailaren 25ean, 10.00etatik 18.00etara. Parte hartzeko aukerak eta baldintzak ematea ezinbestekoa da, eta lotura estua du parte hartzeko eskaintzen diren denborekin, moduekin eta bitartekoekin. Kasu honetan, honako gai hauek landuko dira: baldintza eta ezaugarri horietan parte hartzea, nork parte har dezakeen edo ez; hobariak, ordainketak, parte hartzeko zailtasun gehien dutenei bidea emateko egon daitezkeen neurriak; edo neurri horiekin sortzen zaizkigun zalantzak eta oztopoak.
Hirugarren eta azken saioa Okendo Kultur Etxean izango da martxoaren 24an, 10.00etatik 13.00etara. Parte-hartzeak hainbat ezaugarri eta mekanismo eskatzen ditu, eta horiek ezagutzeak herritarren parte-hartzea baldintzatu dezake. Bide horretan, hirugarren solasaldiak parte-hartze digitalaren aukerak eta mugak aztertuko ditu.

Saio guztietan bilatzen da pertsona desberdinak egotea, leku eta ordutegi desberdinetan hitz egingo dutenak. Funtsean, modu batera edo bestera parte-hartzean buru-belarri dabiltzan aktoreak biltzea da helburua, herritarrek politika publikoetan parte hartzeko helburu partekatua lortzeko eta horretan sakontzeko, eta elkarrekin hitz egiten, entzuten eta pentsatzen jartzeko. Saioak irekiak dira, eta horietan administrazioko teknikariek, arduradun politikoek eta antolatutako edo antolatu gabeko herritarrek parte har dezakete. Horiei guztiei giro seguruago eta askeagoetan hitz egiten jarri nahi zaizkie, erronka partekatuak dakartzaten gakoez hitz egiteko.