AP-8ko zarataren aurkako pantailak abuztuaren amaierarako jarriko egongo dira

Aintzane Oiarbide Bide Azpiegituretako diputatuak Bidegi foru elkartea AP-8an, Elgoibar parean, zarataren aurkako pantailak eraikitzeko egiten ari den lanak bisitatu ditu. Obrek barne hartzen dute 1271 metroko pantaila metaliko fonoxurgatzaileak instalatzea autobidearen bi noranzkoetan, zubibidearen egitura sendotzea, euste-sistema eta drainatzea berritzea eta bide-zorua hobetzea. Proiektuak 1.550.180 euroko aurrekontua du. Diputatuak gogorarazi duenez, Gipuzkoako Foru Aldundiak errepideetako zarataren aurka egindako ekintza planean du jatorria jarduera honek. "Eremu horretan plana egiteko egindako zarata-azterketaren arabera, 2.000 pertsona inguru daude gaueko ordutegian 55 dezibelio baino gehiagoko zarata-mailaren eraginpean. Egunean zehar, Elgoibarko Ikastetxea eta Elgoibar Arreiturre BHI bezalako eraikinek 60 dezibelio gainditzen dituzte. Pantailak jartzeak Erretsindi, Basarte, Arregitorre eta San Roke kaleko eta Errotaberri auzoetako bizilagunen bizi-kalitatea nabarmen hobetuko du ", zehaztu du Oiarbidek.

Bisitan, diputatuarekin batera, Ane Beitia herriko alkatea eta Alfredo Etxeberria Bidegiko zuzendaria egon dira, eta Arregitorre gainetik obrak ondo doazela egiaztatu ahal izan dute. Ane Beitia Elgoibarko alkateak Elgoibarko Udalaren eta Gipuzkoako Foru Aldundiaren arteko lankidetza azpimarratu du, eta "oso albiste ona" dela uste du pantaila akustiko horiek ia 1.300 metrotan jartzea, Elgoibarren autobideak zarata gehien sortzen duen eremuan. "Hesi horiek jartzeak kutsadura akustikoa geldiaraziko du, eta eragin oso positiboa izango du udalerriko bizilagunen ongizatean. N-634 errepidean ere kutsadura akustikoa murrizteko neurriak aztertzen ari gara eta Gipuzkoako Foru Aldundiarekin elkarlanean jarraituko dugu ".

Bestalde, Bidegiko zuzendariak zehaztu duenez, Bilboko noranzkoan, pantaila akustikoek 866 metroko luzera izango dute eta beste 405 metroko Donostiarako norabidean. Adierazi duenez, lanak bost zatitan gehi  Sallobenteko zubibidean egingo dira. Azken honetan, zarataren aurkako pantailak jartzeaz gain, euste-sistemak eguneratuko dira.

1go eta 2. tarteak Donostiarako norabidean daude, eta Erretsindi eta Basarte eremuetan eragiten dute: 165 eta 84,5 metro luze dira, hurrenez hurren, eta pantaila-altuera 4 metrokoa da. 3., 4. eta 5. tarteak Bilborako noranzkoan daude. Hirugarren eta laugarren atalek 272 metroko eta 59 metroko luzera duten bi pantaila hartzen dituzte, biak San Roken, 4 metroko altuerarekin. 5. zatiak, luzeenak (379 metro), Ermuaran bidea eta ikastola babestuko ditu, 1,5 metrotik 2,5 metrora bitarteko altuera desberdineko pantailekin.

Une honetan Basarteko 2. zatia eta San Rokeko 3. eta 4. zatiak egiten ari dira, eta zubibidearen drainatze-sistema ere hobetzen hasi dira. Aste Santuaren ondoren, euste-sistema berritzeko lanak hasiko dira, eta 2 metroko altuera duten pantailak jarriko dira zubibidearen bi aldeetan. Ondoren, 5. zatiko pantailak jarriko dira, eta, azkenik, 1. tartea egingo da, Erretsindikoa, 169 metroko luzerarekin eta 4 metroko altuerarekin.

Bisita amaitzeko, Bide Azpiegituretako diputatuak aurreratu duenez, Elgoibarren egiten ari diren jardueraz gain, Zarautzen zarataren aurkako pantaila berriak ere jartzea aurreikusi du Bidegik, gaur egun dauden pantailen sistema osatzeko. "Proiektua 2021eko bigarren seihilekoan idatziko da, eta instalatuko diren pantailen tipologia eta altuera desberdinak zehaztuko ditu. Horrek eragin zuzena izango du eraikin sentikorretan, hala nola La Salle ikastetxean, Orokietan, Lizardi institutuan eta Zarauzko osasun-zentroan".