ATECEk bere martxa solidarioa ospatuko du igande honetan hartutako garun kaltea duten pertsonen alde

ATECEk elkarte gisa 29 urteko ibilbidea du, lasterketa solidario bat antolatu du azken 8 urteetan, eta igande honetarako, ekainak 18, lehen martxa solidarioa deitu du, Gipuzkoan hartutako garun-kaltea duten ehunka pertsonak eta haien familiek bizi duten errealitatea ikusarazteko, kontzientziatzeko eta sentsibilizatzeko helburuarekin. Hala adierazi dute gaur goizean Maite Peña Gizarte Politiketako diputatuak eta Jose Manuel Amador ATECEko presidenteak, Foru Jauregian egindako prentsaurrekoan.

Ibilaldia 10:00etan hasiko da Alderdi Ederren, nautikoaren aurrean, eta Kontxako pasealekua zeharkatuko du Perla pareraino iritsi arte, eta Donostiako udaletxera itzuliko da. Izen-ematea Herrikrosaren webgunearen bidez egin daiteke (www.herrikrosa.eus), eta 7 euroko kostua du (12 euro igandean 9:00etatik aurrera). Martxa hau antolatu da kaltetuek, senideek eta lagundu nahi duten herritar guztiek parte har dezaten.

Jose Manuel Amadorrek azpimarratu du lasterketaren bidez lortzen diren funtsak elkarteak pertsona guztientzat antolatzen dituen jarduerak hobetzeko erabiliko direla. “Baina, batez ere, azpimarratu nahi dugu lasterketa honen helburu nagusia pertsona horiei ahotsa ematea eta gizarte osora iristea dela, haien errealitatea eta premiak ezagutarazteko”.

Diputatuak, bere aldetik, adierazi du ATECEk, duela 29 urte baino gehiagotik, eta familia talde baten ekimenez, “atsedenik gabe” lan egiten duela ehunka pertsona eta familiaren bizitza hobetzeko, “diziplinarteko arreta baten bidez, pertsona bakoitzak behar duten laguntza eta arreta eskaintzen dutelako, kolektibo oso heterogeneoa baita artatzen dutena eta premia oso desberdinak dituzte”. Gainera, bat egin du ATECEren deialdiarekin, eta pertsona guztiei gonbita luzatu die elkartasun goiz horretan parte hartzeko, helburua izanik “hartutako garun-kaltea duten pertsonen errealitatea ikusaraztea eta ezagutaraztea”.

Goiz solidarioa

ATECEk hainbat jarduera antolatu ditu ekainaren 18rako, dortsalak eta motxilak banatzeaz eta martxaz beraz gain, sarien zozketa egingo da ibilbidea amaitzean. Izena emandako pertsona guztiek jasoko dituzte dortsala eta motxila bat, botila bat ur eta gaileta batekin, biak Aramendiaren eskutik, Pasquier Recondo opil bat eta Eroskik ipinitako fruta pieza bana. Jose Manuel Amadorrek azpimarratu duenez, “oso modu berezian eskertzen ditugu gurekin modu erabat desinteresatuan lan egin duten enpresa eta pertsona guztiak, parte-hartzaile guztien artean zozkatuko ditugun sari garrantzitsuak ematearen bidez”.

Besteak beste, La Perla talasoterapiarako sarrerak, Saigon Jatetxean afari bat, Amara Plaza Hotelean gau bat, Martin Berasategiren liburuak, Karlos Arguiñanoren liburuak, Fortuna Klubeko kirol desberdinetarako bonuak eta Hegalak ezagutzeko gonbidapenak zozketatuko dira.