Cristina Enea Fundazioak bizikleta mugikortasuna aztertuko du genero ikuspegitik Foru Aldundiaren laguntzarekin

2019an, erabiltzaileen % 21 emakumeak ziren, eta horrek esan nahi du  5 puntu igo dela bizikletaren erabilera emakumeen artean.

 

Ander Iturri Mugikortasuneko Zuzendaria Cristina Enea Fundazioarekin elkarlanean aritzeko urteroko protokolo orokorra berritu eta zabaldu duela aurkeztu du prentsaurrekoan.  Hitzarmen hau gaur goizean berritu da Cristina Enearen egoitzan. Bertan izan dira, gainera, José Mª Hernández Cristina Enea Fundazioko zuzendari kudeatzailea eta Itziar Alonso Albiol "Kultura, Ezagutza eta Emozioa" Eusko Jaurlaritzako talde finkatuko kide eta ikertzailea.

 

Foru arduradunak bizikleta bidezko mugikortasunaren alorrean ikerketa lerro bat martxan jarri izana nabarmendu du, "emakumeen segurtasun pertzepzioa zein den eta espazioek mugitzen garen moduan nola eragiten duten agerian jartzen saiatuko dena". Ikerketa horren izenburua "Hiriko eta hiri inguruko bizikleta istripuak generoaren eta psikologiaren ikuspegitik" da, eta 5.000 euroko dirulaguntza jasoko du. Miriam Garallin, Sonia Padoan eta Jara Mendiak parte hartuko dute, Itziar Alonsok zuzenduta.

 

Iturrik adierazi duenez, hitzarmena zabaltzeak bizikleta mugikortasunarekin eta mugikortasun hori bultzatzeko jarduera guztiekin bi erakundeek duten konpromisoa berrestea ahalbidetu du.   Zehazki, ikerketa honek emango dituen aukerak azpimarratu ditu, "erakusteko datu ukaezinekin nola eragiten duten emakumeek espazioetan bizikleta erabiltzean".  Azaldu duenez, azken urteotan emakumeen mugikortasunak hobera egin duen arren, "oraindik ere ezberdintasunak daude, eta joan-etorrietarako hautu asko genero desberdintasunak eraginda hartzen dira".     

 

Gure lurraldean bizikletaren erabilerari dagokionez, datuak "itxaropentsuak" dira. 2019an, datuak ditugun azken urtean, erabiltzaileen % 21 emakumeak ziren, eta horrek esan nahi du 5 puntu igo dela bizikletaren erabilera emakumeen artean.  "Albiste ona da, zalantzarik gabe", baina Ander Iturriren ustez, "oraindik lan asko dago egiteko".

 

Itziar Alonso "Hiriko eta hiri inguruko bizikleta istripuak genero eta psikologia ikuspegitik" ikerketa egingo duten taldeko ordezkariak azaldu duenez, ikerketa hau aukera "paregabea eta berezia" da bizikleta mugikortasunari genero ikuspegitik heltzeko, "oraindik inork ez baitu gai hori sakon aztertu ikuspegi horretatik".  Azterlanak bi generoen istripu tasari buruzko ikuspegia jasoko du, eta horrek emakumeen mugikortasunaren ikuspegia izatea ahalbidetuko duten datuak emango ditu; "erabat berritzailea" da eta "ikuspegi desberdinei buruzko funtsezko gakoak" emango ditu.                

 

Alonsoren iritziz, poztekoa da bizikleta mugikortasunarekin lotutako ikerketa ildo berriak genero ikuspegiaren arabera aztertzeko aukera izatea, eta honako hau adierazi du: "bizikleta istripuak generoaren eta psikologiaren ikuspegitik aztertzea funtsezkoa izan daiteke emakumeek bizikletaren erabilerari dagokionez dituzten jokabideak ulertzeko".  

 

Ildo horri jarraituz, Cristina Enea Fundazioko zuzendari kudeatzaile José Mª Hernándezek Ziklotekak 2015ean eratu zenetik egindako lana nabarmendu du. "Gure eguneroko lana finkatzea lortu dugu, eta etorkizuneko erronka berriei aurre egiteko unea da, lortutako lana sendotzeko".  Hernandezen hitzetan, Zikloteka "oso ondo baloratutako" proiektu bat da, "Estatuko beste hiri eta probintzia batzuetako erakundeen eta udalen bermea duena, eta nazio mailan ospea eman diguna".    

 

Horren ondorioz, Ander Iturri Mugikortasuneko Zuzendaria gogorarazi du bere departamentuak ahalegin handia egin duela "mugikortasun jasangarriago baterantz aurrera egiteko, gizarte bidezkoago eta demokratikoago baten alde egiten duen mugikortasun baterantz".