Gipuzkoa da hondakinen kudeaketaren buru Espainian, eta modu egokian egiten du aurrera, ekonomia zirkular jasangarri baterantz

José Ignacio Asensio: "Emaitzek Gipuzkoako lidergoa berresten dute, birziklatzean Estatuko batez bestekoa ia hirukoizten duelako eta Europak 2025erako ezarritako helburua gainditzen duen lurralde bakarra delako. Datu horiek Zubietako azpiegituren eraginkortasuna eta gure herritarren kontzientziazio maila handia berresten dute".

"Gipuzkoak ekonomia zirkularrarekiko konpromisoa berresten du, eta ekonomia berde eta deskarbonizatu berri bat garatzeko aukeratzat jotzen du. Bide horretan industria indartu nahi da, bidezko eta kalitatezko enplegua sortu, eta trantsizio ekologikoa inklusiboa eta ekitatiboa izango dela ziurtatu".

Gaur, Ekonomia Zirkularraren Fundazioak Gipuzkoako hondakinen egoerari buruz Anticipa proiektuaren esparruan egindako txostenaren aurkezpenean, Jasangarritasun diputatu eta Gipuzkoako Hondakinen Kontsortzioko presidente José Ignacio Asensiok eta Ekonomia Zirkularraren Fundazioko presidente Ángel Fernández Homarrek, txosten horren emaitzak ezagutarazi dituzte, eta Gipuzkoak hondakinen kudeaketan dituen lorpenak eta erronkak nabarmendu dituzte.

Txostenaren arabera, Gipuzkoak arrakastaz gainditu ditu Hondakinen Esparru Zuzentarauak Espainiarako eta Europarako ezarritako helburuak, eta 2021ean % 55,32ko birziklapena lortu du; muga-eguna baino bost urte lehenago gainditu du ezarritako % 55eko helburua, eta zero isurketa lortu du Gipuzkoako Hondakinak Kudeatzeko Plan Integralaren (GHHKPO) hedapenari esker. Emaitzek erakusten dute Gipuzkoa lurraldean sortzen diren hondakinei estaldura ematen dieten instalazioen sare sendoaz hornitu dela, eta nabarmentzen da Gipuzkoa gaur egun hondakinen kudeaketan aitzindaria dela, eta zifra horiek erreferentzia argia direla estatu mailan.

Gipuzkoako emaitzak Euskadiko eta Estatuko batez bestekoekin alderatuz, prebentzioan eta berrerabilpenean, gaikako bilketan eta birziklapenean, eta isurketan, Gipuzkoa gainetik dago. Zehazki, % 110 Euskadiri dagokionez, eta % 184 Espainiari dagokionez. Ardatz guztietan nabarmentzen da: isurian ( % 122 Euskadirekin alderatuta eta % 169 Espainiarekin alderatuta), birziklatzean ( % 110 Euskadirekin alderatuta eta % 188 Espainiarekin alderatuta) eta prebentzioan ( % 101 Euskadirekin alderatuta eta % 183 Espainiarekin alderatuta).

Anticipa txostenak adierazten du Gipuzkoak bi esparrutan jarraitu behar duela hobetzen etorkizunera begira: prebentzioan eta hondakinen berrerabileran. Berrerabiltzeari dagokionez, Gipuzkoa martxan dago jada, Berrerabiltzeko eta Birziklatzeko Prestakuntza Zentroaren (CPR) bidez. Zentro horrek urtean 12.600 tona ehun, material elektroniko eta tamaina handi berreskuratuko ditu bere bizitza baliagarria luzatzeko. Bestalde, Zubietako Baterien Hub-a ere badugu, ‘Zirkular Bat' izena duena. Atzo aurkeztu zen, eta iturri berriztagarrietatik sortutako energia biltegiratzeko alternatiba bat da.

Murrizketaren eta berrerabileraren esparruan aurrera egiteko bi proiektu horiez gain, Gipuzkoak birziklapenaren arloan hobetzen jarraitu behar du, GHHKPOk ezartzen duen % 70eko helburua lortzeko. Arlo horretan, plastikoa birziklatzeko ekonomia zirkularreko poloa izango da garatuko den proiektuetako bat. Proiektu horri esker, plastiko erabilia bigarren mailako lehengai bihurtuko da plastiko berriak ekoizteko, petrolioa erabili beharrik gabe.

Gipuzkoako Hondakinen Kontsortzioko presidente eta Jasangarritasun diputatu José Ignacio Asensiok adierazi duenez, "emaitzek Gipuzkoako lidergoa berresten dute, birziklatzean Estatuko batez bestekoa ia hirukoizten baitute eta Europak 2025erako ezarritako helburua gainditzen duen lurralde bakarra baita. Datu horiek Zubietako azpiegituren eraginkortasuna eta gure herritarren kontzientziazio maila handia berresten dute".

Asensiok adierazi duenez, "Gipuzkoak ekonomia zirkularrarekiko konpromisoa berresten du, ekonomia berde eta deskarbonizatu berri bat garatzeko aukeratzat hartuta. Bide horretan industria indartu nahi da, bidezko eta kalitatezko enplegua sortu, eta trantsizio ekologikoa inklusiboa eta ekitatiboa izango dela ziurtatu".

Anticipa proiektua

Anticipa proiektua hondakinen kudeaketarekin lotutako datuen eta adierazleen jarraipen zehatza egiteko asmoz sortu zen, hiri-hondakinak birziklatzeko eta isurtzeko Europako estandarrak betetzeko helburuarekin. Testuinguru horretan, helburu argiak ezarri dira, besteak beste, hiri-hondakinen egoeraren diagnostiko zehatza izatea, neurrien inplementazioa espero diren emaitzekin lotzea eta lurraldeen artean neurrien ezarpen-maila alderatzea.