Gipuzkoako Foru Aldundiak Algaraklown saritu du, ospitaleko pailazo boluntarioen taldea, ‘sendatzen duten irribarreak’ eskaintzeagatik

Algaraklown ospitaleko pailazo taldeak 2024ko Boluntariotzaren Saria jaso du gaur. Zeremonia, hamahirugarren edizioari dagokiona, Foru Jauregiko Gunea zentroan egin da, eta bertan elkarte horrekin lankidetzan diharduten boluntarioen lana nabarmendu da. Ekitaldia Boluntariotzaren Nazioarteko Egunean egin da, eta ehun pertsona inguru bertaratu dira. Esker oneko, laguntzako eta hurbiltasuneko hitzek markatu dute jardunaldia, baita umore onez beteriko giroak ere, pailazoak tarteko izanda, saihestezina.

XXX. edizioan, Gipuzkoako Boluntariotza Sariak beste behin ere balian jarri du gizarte-lanean eta boluntariotza bultzatzen egindako lanagatik nabarmendu diren pertsona eta gizarte-erakundeen konpromisoa. Aurten, berrikuntza gisa, ohorezko aintzatespenaz gain, elkarte irabazleak 2.500 euroko saria jaso du.

Maite Peña Zainketa eta Gizarte Politiketako foru diputatuak Gipuzkoako Boluntariotza Sariaren garrantzia azpimarratu du, boluntariotzaren eta gizarte-ongizatearen alde egindako lanagatik nabarmentzen diren pertsona eta gizarte-erakundeen lana publikoki aitortzeko helburuarekin. "Sari honek nabarmentzen du ekimen hauek pertsonen bizitzan duten eragina, kasu honetan, haurren eta euren familien bizitzan; Gipuzkoa kohesionatuagoa eta solidarioagoa eraikitzen laguntzen dute", adierazi du.

Foru diputatuak nabarmendu duenez, Algaraklownek, ospitaleko pailazoen proiektuarekin, umorea eta enpatia tresna indartsu bihurtu ditu gehien behar dutenei ongizatea eta laguntza emozionala emateko. Sentsibilitatea eta sormena uztartzen dituen lan honek alde nabarmena markatu du egoera zailei aurre egin behar dieten haurren bizitzan, irribarreak ez ezik, une zailetan kontsolamendua ere eskainiz.

Peñak adierazi duenez, sari honekin, Gipuzkoako Foru Aldundiak boluntarioen lan baliotsua aitortu nahi du, eta mugimendu honen boterea balorean jarri, gizartearen aldaketa positiboaren eragile gisa. Sari honek gogorarazten du ekintza solidarioek benetako eragin iraunkorra dutela, eta herritarrak inspiratzen dituela Gipuzkoa kohesionatuago eta gizatiarrago bat lortzen laguntzen duten ekimenetan parte hartzera.

Pailazoak eta boluntarioak

Sortu zenetik, Algaraklownek ospitaleko esperientzia eraldatu du umorez eta enpatiaz. Ospitaleko pailazoen nazioarteko ereduek inspiratuta, fundatzaileetako batek proiektua bultzatu zuen 2012an, beste lankide batzuekin batera, Madrilen formatu ondoren. Orduz geroztik, taldeak irribarreak eta babes emozionala eskaini dizkie haurrei, haien familiei eta ospitaleko osasun-langileei.

Gaur egun, Algaraklownek 12 ospitaleko pailazoz osatutako talde bat du, eszenatik kanpo funtsezko funtzioak betetzen dituzten 50 boluntario baino gehiagoren laguntzarekin. Gainera, Goienetxe Fundazioarekin eta bere zentroekin elkarlanean aritzen dira, euren lana beste gune batzuetara zabalduz. Doako prestakuntza eta lankidetza komunitarioa funtsezkoak dira ospitaleetara eta egoitzetara alaitasuna eta gizatasuna eramaten jarraitzeko.

Gizarte-erakundeek aukeratua

Boluntariotza Sariaren edizio honetan, ohitura den bezala, gizarte-erakundeek beraiek aukeratu dute saritutako elkartea. Aspanogi, SOS Arrazakeria, Ortzadar, AGI, Kera Elkartea, Kemen, Begisare, Aspace, Adinkide eta DYA Gipuzkoa elkarteetako ordezkariek osatutako epaimahaiak Algaraklownen lan bikaina nabarmendu du, boluntariotzaren eta elkartasunaren esparruan jarraitu beharreko adibide gisa.

Ezagutzea eta ikusaraztea

Foru diputatuak azpimarratu du Gipuzkoako Boluntariotza Saria funtsezko tresna dela lurraldeko milaka boluntarioen "lan izugarria" aitortzeko eta ikusarazteko, egunez egun besteei laguntzen baitiete, trukean ezer espero gabe. Sari honek boluntariotzak Gipuzkoa solidarioago baten eraikuntzan duen "garrantziaz eta onurez" kontzientziatzea ere bilatzen du.

"Lurralde solidarioa gara. 718.000 biztanle pasatxorekin 40.800 pertsonak baino gehiagok eskaintzen diote denbora boluntariotzari", nabarmendu du diputatuak. Gainera, Gipuzkoako Foru Aldundiak erakunde horiei laguntzen jarraitzeko duen konpromisoa berretsi du, gizarte justuago, kohesionatuago eta solidarioago baterantz aurrera egiteko "funtsezkotzat" jo baititu.

Honako hauek dira aurreko edizioetako irabazleak: Nagusilan (2002), Hijas de la Caridad (2003), DEE (2004), CERMI (2005), Gipuzkoako Espetxe Pastoraltza (2006), Juan María Garitano (2007), Izan Fundazioa – Gizakia Proiektua (2008), Behar Bidasoa (2009), DYA Gipuzkoa (2010), Itxaropenaren Telefonoa (2011), Laringektomizatuen Elkartea (2012), Odol Emaileak (2013), Koldo Aulestia (2014), Gipuzkoako Elikagaien Bankua (2015), Hurkoa (2016), Atzegiko boluntarioak (2017), Jose Mari Soroa (2018), Charo Martínez Lascurain (2019), Begisare (2020), Kemen (2021), ATECE (2022), eta Aspace (2023)