Gipuzkoan Gazte Tour 2024 ekainean itzuliko da Andoainen eta Ordizian programazioekin

Gipuzkoako Foru Aldundiko Kultura eta Gazteria Departamentuak iragarri duenez, aurten ere hemen da Gipuzkoan Gazte Tour programa. 16 eta 25 urte bitarteko gazte eta nerabeei zuzendua dago, eta kultura eragileekin eta udalekin lankidetzan garatu da, esperientzia aberasgarria eta dibertigarria eskaintzeko asmoz, musika eta arte eszenikoak protagonista bihurtuta. Aurkezpenean izan dira Goizane Álvarez Irijoa Kultura eta Kiroletako diputatua, Isaac Palencia Gazteriako zuzendaria, Andoni Álvarez Andoaingo alkatea eta Adur Ezenarro Ordiziako alkatea.

Goizane Alvarez Irijoa Kultura eta Gazteriako diputatuak azaldu duenez, GGT duela zazpi urte jaio zen programa bat da, eta “publikoak gaztetzea eta Lurralde honetako gazteei kultura-eskaintza bat ematea du helburu, beren interesen arabera”. Halaber, esan du garrantzitsua dela erakunde publikoetatik, Gipuzkoako Foru Aldunditik esaterako, kontuan hartzea zein diren kolektibo horren gustuak, eta horretarako, “modu parte-hartzailean” egiten dugu, gazteentzako aisia eta kultura programatzeko orduan.

Andoni Alvarez Andoaingo alkateak balorean jarri nahi izan ditu Kultura eta Gazteria batzen dituen edozein egitasmo; Gipuzkoan Gazte Tour norabide horretan doan egitasmoa dela azpimarratu du: “Gure kultura jendarteko sektore guztietara zabaltzea nahi dugu, baita gazteengana ere. Euskal Herrian handia da kulturak duen emaria diziplina guztietan, eta handia da horretaz gozatzeko dugun ondare eta eraikin kopurua. Hor ere ikusi nahi ditugu gazteak, ez baitago herri baten esentzia bere kulturaren bitartez iristeko modu hobeagorik. Alde horretatik, tankera honetako egitasmoak sustatzen jarraitzea “ezinbesteko” jo du Alvarezek.

Bestalde, Adur Ezenarro Ordiziako alkateak adierazi duenez, “aurten ere Gipuzkoan Gazte Tourraren edizio berri bat izango dugu, eta oso garrantzitsua iruditzen zaigu gazteei zuzendutako programa. Beti izan behar dugu kontuan kolektibo hori, eta Ordizian urte osoan egiten ditugun jarduera asko ditugu, kultura azpimarratuz... baina, zalantzarik gabe, kulturak erakargarria izan behar du gazteriarentzat, eta kontzertu horiek haiengana gehiago hurbiltzen laguntzen digute. Aurten ere kontzertu bikain hauetaz gozatzeko aukera izatea espero dugu.

2018an abian jarri zenetik, Gipuzkoan Gazte Tour kultura erreferente bihurtu da Gipuzkoako gazteentzat, eta partaidetza % 60 igo da. Arrakastaren gakoa publikoaren parte hartze aktiboan datza. Publikoak artista nagusien eta tokiko artisten aukeraketan parte hartzen du, sare sozialetan egindako inkesten bidez, eta, horrela, gazteen gustuaren araberako programazioa bermatzen da.

2024ko edizioak jarduera ugari izango ditu: kontzertuak, masterclassak, tailer pedagogikoak eta askoz gehiago. Programa ekainaren 1ean abiatuko da, Andoainen, Raymond Naval koreografo ospetsuaren kargura, eta, ondoren, kontzertu bat egingo da Basteron, Soge Culebra, Anixe eta Láx Lázaro bertako talentuarekin.

Gainera, Gipuzkoan Gazte Tour Gipuzkoa osora zabalduko da, eta Hondarribia, Zumarraga, Eibar, Arrasate eta Ordizian izango dira hitzorduak. Ekitaldi bakoitzak programazio jakin bat izango du, artista ezagunen emanaldiak eta tokian tokiko talentu berriak aurkitzeko aukerak eskainiko dituena.

Nabarmentzekoak dira, halaber, tailer pedagogikoak. Aurten, besteak beste, jarduera hauek eskainiko dira: euskarazko rap tailerra La Basurekin, DJ tailerra Oihan Vegarekin, eta dantza-masterclassa sektoreko profesional ezagunekin. Jarduera osagarri horiek aukera ematen diete gazteei ikasteko eta beren trebetasun artistikoak giro estimulatzaile eta sortzailean garatzeko.

Gipuzkoan Gazte Tour ekitaldi inklusiboa eta irisgarria da, eta sarrerek arrazoizko prezioa izango dute (3 euro inguru), horrela, kultura eta musika guztien eskura egon daitezen. Sarrerak ekitaldiaren webgune ofizialean eta ohiko salmenta puntuetan egongo dira salgai.

Gipuzkoako Foru Aldundiko Kultura eta Gazteria Departamentuak gazte eta nerabe guztiak Gipuzkoan Gazte Tour 2024 programarekin bat egitera eta esperientzia kultural batez gozatzera gonbidatzen ditu. Informazio gehiago nahi izanez gero eta ekitaldien egutegi osoa ezagutu nahi izanez gero, bisitatu gure web orri ofiziala eta sartu gure sare sozialetan.

ANDOAIN

Maiatzaren 31n, ostirala, Andoaingo Gaztelekuan, 19:00etan, dantza masterclass bat izango da Raymond Naval koreografo eta dantzariarekin; Bebe Rexha edo David Guetta artistekin aritutakoa da, besteak beste. Izena emateari buruzko informazioa eskuratzeko, Gaztelekura bertara jo behar da.

Ekainaren 1ean, larunbata, 19:30etik aurrera, Basteron, Soge Culebra artista nazional ezagunenetako bat izango da: askoz ere artista melodikoagoa da hiritarra baino, eta askoren ustez, Quevedoren edo Saikoren ondorengoa da Espainiako hiri-eszenan.

Anixe abeslari gipuzkoarrak, Etxepeko taldekoak, taldea alde batera utzi du bakarlari gisa hasteko, eta GGTn izango da. Amaitzeko, Láx Lázaro artistak joko du tourraren geraleku honetan.

Sarrerak auditorioaren webgunean jarriko dira salgai, eta 3 euro balioko dute.

ORDIZIA

Andoainen bezala, Ordizian dantza masterclass bat egongo da; ekainaren 7an, ostiralean, izango da, D'Elikatuz zentroaren aretoan, Leire Dallas dantzari eta koreografoak emana; oso ezaguna da eta askotan parte hartu du Operación Triunfo programan, eta Dua Lipa, Bad Gyal edo La Mala Rodriguez artistekin lan egindakoa da.

Ekainaren 8an, larunbata, musika programazioa egingo da Plaza Nagusian. Bertan, Gaztea irratian izugarrizko arrakasta izaten ari den "Tatta" artista euskaldunak parte hartuko du, eta harekin batera We are Spinellis bizkaitarrak igoko dira oholtzara, Dj Lea-rekin; eta, KM0 artista gisa, Dj Tintz izango dugu, 24 urte baino ez dituen gazte bat, plateren atzean benetako maisutasuna erakusten duena.

GGTren aurtengo egitaraua osatzeko, 2024ko udazken/neguan beste lau saio izango dira.

Bigarren seihilekoko datak

URRIAK 5 – HONDARRIBIA

URRIAK 12 – ZUMARRAGA

URRIAK 26 – EIBAR

AZAROAK 30 - ARRASATE