Laguntzaile birtuala duen app batek irabazi du sari nagusia lehen ‘Hackathon’ ekimenean

Joan den asteburuan Miramon Parke Teknologikoan ospatu zen lehenengo Hackathon 'Gipuzkoa Turismoa' -k lurraldeko sektore turistikoan dagoen maila teknologiko eta sortzaile altua erakutsi zuen. Asteburuan zehar, 30 bat parte-hartzailek, zazpi lantaldetan banatuta, sektore teknologikoko profesionalak eta ikasleak (aplikazio mugikorren garapena, webguneak, etab.) eta sektore turistikoko profesionalak tartean zirela, Gipuzkoan turismo-fluxuak banatzera bideratutako irtenbide digital bat bilatu eta garatzeko erronkari aurre egin behar izan zioten.

Lantaldeek ideia pentsatu eta prototipoa garatu behar zuten larunbat eta igande goizean. Igande arratsaldeko lehen orduan, aurkezpenak egin ziren eta, ondoren, epaimahaiaren deliberazioa, “proiektu irabazle bat aukeratzeko zailtasun handia eta talde guztiek denbora errekorrean egindako lan handia” aitortu zituena. Batzorde hori Marisa Arriolak (BIC Gipuzkoako zuzendaria), Jesus Herrerok (TECNALIA), Addaia Arizmendik (OMT), Sabino San Vicentek (Euskaltel Fundazioa) eta Miren Eloseguik (Hispavista) osatu zuten.

 

Proiektu irabazleak

Lehen saria 1.500 eurokoa izan zen, “Gipuzkoa Go” proiektuarentzat izan zena. Aplikazio mugikor horrek ahots-laguntzaile birtuala du, eta, “Pokemon Go” joko ezagunaren antzera, Gipuzkoako geografian barrena ibiltzera bultzatzen du, oraingoan deskontu eta sustapenekin truka daitezkeen txape» batzuen bila. Joaquin Moriche, Ariane Atxa Gamboa eta Borja Fedik osatu zuten taldea.

Bigarrenik, 1.000 euroko zuzkidurarekin, “Miatu” proiektuak web-app aplikazio bat eskaintzen zuen, Gipuzkoako historia ezagutzeko hainbat ibilbide tematiko alternatiborekin, eta, aldi berean, tokiko merkataritzan kontsumoa bultzatzen du, gamifikazio- eta pizgarri-prozesu baten bidez. Mikel Sánchez, June Altieri, Irune Mateos, María Basa eta Jarold Meléndez Lugok osatu zuten taldea.

Samuel Vidalek, Patxi Juaristik eta Nere Ariztoyk osatutako taldeak itxi zuen podiuma, “Gipuzkoa People” proposamenarekin. 500 euroko saria jaso zuen, eta webgune bat aurkeztu zuen, ‘Tinder’ hitzorduen aplikazioan oinarritutakoa eta Gipuzkoako txoko guztietan zehar planak eskaintzen zituena, plataforma horretan profila eskaintzen duten tokiko pertsonekin batera. Aparteko sari gisa, “Gipuzkoa de cine” proiektuak ‘Ideia onena’ saria jaso zuen, eta “Ba Tur” proiektuak ‘Proiektu iraunkorrena’ saria jaso zuen.

Turismoa sustatzeko modu berriak bilatzea eta berrikuntza helburu duen formatuaren lehen edizioa da. Jabier Larrañaga Ekonomia Sustapen, Turismo eta Landa Inguruneko diputatuak oso positibotzat jo du ekimena. “Kanal digital, hizkuntza eta ideia berrien aldeko apustua funtsezkoa da sektorea indartzeko eta turismoa Gipuzkoako eskualde guztietara erakartzen jarraitzeko. Parte hartu zuten pertsona guztien sormena eta freskotasuna eskertu nahi ditut. Etorkizuna Eraikiz-en printzipioekin guztiz bat datorren formatua da; hots, elkarlanerako eta esperimentaziorako espazioak bultzatzea, proiektu eraldatzaileak abian jarri ahal izateko eta Gipuzkoaren lehiakortasuna eta ongizatea hainbat eremutan indartzeko”.

 

Gipuzkoa Turismoa HUBaren proiektua

Hackathon hau Gipuzkoa Turismoa HUBak sustatutako proiektua da. Iaz jarri zuen Aldundiak martxan, turismoaren sektorea indartzeko eta Gipuzkoako enpresa eta elkarteei ahalik eta potentzial handiena garatzen laguntzeko. “Gipuzkoako turismo industria tamainan hazten lagundu nahi dugu, lehiakorragoa eta berritzaileagoa izan dadin, balio erantsia eta kalitatezko enplegua sortuz", adierazi du diputatuak. Hilabete hauetan zehar, ehun enpresa baino gehiago atxiki dira eta etengabe parte hartzen dute prestakuntza-jardueretan, topaketa profesionaletan eta, kasu askotan, beren merkataritza-bileretarako eta lantokirako egoitza gisa.