New Yorkeko Cure biozientzien inkubadora ezaguna bisitatu du diputatu nagusiak, Gipuzkoarekin elkarlan bideak lantzeko helburuarekin

 

Imanol Pradales lehendakaria Ameriketako Estatu Batuetan gidatzen ari den erakunde misioaren testuinguruan, Gipuzkoako diputatu nagusiak, Eider Mendozak, hiru egunez New Yorken antolatutako ekonomiaren alorreko programari ekin dio gaur. Jakina denez, hitzordu nagusia bihar goizean izango da, euskal herri ordezkariek IBMk New Yorken daukan egoitza nagusira egingo duten bisitarekin. Gaur, hitzordu horren bezperan, biozientziei lotutako ekimen aitzindariak ezagutzeko aukeraizan du diputatu nagusiak Cure bioinkubadoran, kuantikarekin batera sektore honetan nazioarteko mailan posizionatzen hasia baita Gipuzkoa.

Ekonomia Sustapeneko eta Proiektu Estrategikoetako diputatuarekin, Ane Insaustirekin, batera, Manhattango Cure Biotech inkubadoran lan bilera izan du Mendozak eta bertatik bertara ezagutu ahal izan dituzte biozientziei lotutako ekimen, proiektu eta start up aitzindariak, Gipuzkoan eremu honetan garatzen ari den ekosistemaren bidelagun izan litezkeenak. Zehazki, Dearfield Catalist eta Excelsior Sciencesenpresekin izan dute topaketa. “Bisita emankorra izan da proiektu benetan interesgarriak ezagutzeko aukera izan dugulako eta gure lurraldearekin elkarlan bide ezberdinen aukerak lantzen hasteko aukera eman digulako”, azaldu du diputatu nagusiak. 

Biozientzien inkubadorako arduradunen eskutik jakin aha izan dute 22 enpresa proiektu eta 700 lanpostu batzen direla bertan eta, aldi berean, foru ordezkariek aukera izan dute Gipuzkoan erakunde publikoak eta hainbat enpresa terapia aurreratuen alorra garatzeko lantzen ari diren estrategia partekatzeko. “Benetan pozgarria izan da zenbateko atentzioa sortzen duen Manhattanen gure lurraldean hedatzen ari den biozientzien estrategiak”, adierazi du Mendozak, berriki Columbus VenturePartnersek Donostiako Parke Teknologikoan iragarritako inbertsioak hizpide hartuta. “Donostia eta Gipuzkoa biozientziei lotutako proiektu eta talentua erakartzeko gune bilakatzen ari dira, eta horretan sakontzeko New Yorken ezagututakoak bezalako bidelagunak behar ditugu”, jakinarazi du. 

Arratsaldean, Lehendakariak eta New Yorkeko Euskal Etxeak eskainitako harreran parte hartuko du diputatu nagusiak, euskal komunitatearekin ez ezik, Estatu Batuetara lanera joan diren hainbat profesionalekin topaketa emankorra izateko aukera izan duelarik.

Bihar goizean, Imanol Pradales lehendakariarekin batera, IBMk New Yorken daukan egoitza nagusian izango da Mendoza, konpainiako ordezkari nagusiekin bilera egin eta aurten Donostiako Ibaetako kanpusean kokatuko den superordenagailu kuantikoaren azken berriak emateko.