Pello Leiñena donostiarra izango da Eresbil-Musikaren Euskal Artxiboaren zuzendari berria

Pello Leiñena donostiarra izango da datorren uztailaren 1etik aurrera Eresbil-Musikaren Euskal Artxiboko zuzendari berria, Jon Bagüesen ordez. Izendapen hori Eresbileko patronatua osatzen duten lau erakundeek (Eusko Jaurlaritza, Gipuzkoako Foru Aldundia, Errenteriako Udala eta Andra Mari Abesbatza) parte hartu duten hautaketa-prozesuaren ondoren egin da. Bagüesek zuzendari postua utzi eta erretiroa hartuko du, erakunde honen buru 20 urtez egon ondoren, 2000. urtean Jose Luis Ansorena Eresbileko fundatzailearen lekukoa hartu zuenetik.

Pello Leiñena Eresbileko zuzendari berriaren aurkezpena gaur goizean egin dute, Errenteriako egoitzan. Ekitaldian izan dira, Leiñena bera eta Jon Bagüesekin batera, Joxean Muñoz Eusko Jaurlaritzako Kultura sailburuordea, Maria Jose Telleria Gipuzkoako Foru Aldundiko Kultura zuzendari nagusia, Aizpea Otaegi Errenteriako alkatea eta Andoni Sierra, Andra Mari Abesbatzaren izenean. Bertaratutako guztiek goraipatu dute Bagüesek Eresbilen egindako lana eta zorterik onena opa izan diote Leiñenari zeregin berrian.

Leiñena, 29 urtez Eresbilen

Pello Leiñena (Donostia, 1965) Eresbileko zuzendari berria 1991tik da Eresbil musika artxiboko teknikaria, eta, beraz, ondo baino hobeto ezagutzen du orain zuzenduko duen etxea. Musika ikasketak San Ignacio abesbatzarekin eta Donostiako Orfeoiarekin uztartu zituen Leiñenak, Oviedoko Unibertsitatean Musikologian lizentziatuz. Eresbileko teknikari gisa, hainbat erakunde profesionalekin lan egin du, bai artxibo-arlokoak bai musika-arlokoak, eta datu-base espezializatuak diseinatzeko eta kudeatzeko prozesuetan parte hartu du.

Orain, Eresbileko zuzendari gisa "Ibilbide sendoa duen erakunde batek dituen erronka berriei aurre egiteko prest" agertu da, baita ildo berriak proposatzeko ere. Euskal musikaren hedapena eta ondare bezala duen baliotik abiatuta, Leiñenaren helburu nagusia izango da "bere bildumaren balioa nabarmentzea”, eta musika-artxibo eta musika-dokumentuen kudeaketa-sistemetan izandako aldaketa sakonei heltzea. Lan horrek "memoria digital garrantzitsu bat sortzea ahalbidetuko du, helburu izango duena gure egungo eta iraganeko errealitate musikala ezagutzea eta zabaltzea".

Dos décadas al frente de Eresbil

Eresbileko zuzendari berriak Jon Bagüesen (Errenteria, 1955) lekukoa hartu du, azken bi hamarkadetan euskal musikaren erakunde erreferentzialaren buru izan dena. Artxibozaina formazioz, Bagüesek Donostian, Bartzelonan eta Madrilen egin zituen musika eta unibertsitate ikasketak. 1985ean Peñaflorida Kapera sortu zuen, antzinako musika ikertzen eta zabaltzen zuen erakunde interpretatzailea. 2000. urtean Eresbileko gidaritza hartu zuen, erakundearen aita izandako José Luis Ansorena ordezkatuz.

Azken 20 urteetan, Bagüesek artxiboaren antolaketa-egitura finkatu du, bai eta Euskal Herri osoko musika-erakunde eta -entitateekiko harremana ere. Halaber, Jon Bagüés Eusko Ikaskuntza, EHU, AEDOM, Xenpelar eta Musikenerekin hitzarmenak adosteko arduraduna izan zen, besteak beste, euskal musika-ondarea hedatzen laguntzeko helburuarekin. Bere zuzendaritza aldian Eresbilen utzitako musikari eta erakundeen diru eta legatu kopurua nabarmen aberastu da: 111 legatu baituzte.

Musikaren Euskal Artxiboa

Eresbil-Musikaren Euskal Artxiboa 1974an jaio zen, euskal musikaren ondarea bildu, kontserbatu eta zabaltzeko sortutako erakunde gisa. Eresbil Musikaste programatzeari begira sortu zen, Errenterian euskal konpositoreen lanak zabaltzeko astearekin batera. Helburua zen zentro bat sortzea jaialdi horrek zabal litzakeen obrak biltzeko, eta Jose Luis Ansorenaren eta Andra Mari abesbatzaren eskutik sortu zen (Andra Mari abesbatzak 1973tik antolatzen du Musikaste). 1974an bertan, garai guztietako euskal konpositoreen partiturak biltzen hasi ziren; urte hartako irailean, konpositoreen lehen zerrenda egin zen, eta 300 izatera iritsi zen. Gaur egun, Eresbilek 2.174 euskal konpositoreren 35.436 konposizio ditu erregistratuta.

Eresbilek informazioa zabaltzen du datu-baseen, funtsen gidaren eta konpositoreei eta gaiei buruzko web-orri espezifikoen bidez; hori guztia www.eresbil.eus webgunean dago eskuragarri.