Gipuzkoa Saharaz hegoaldeko Afrikari begira jarri da

Emakumeak eta LGTBI kolektiboak bezalako biztanle talde ahulekin lotura duten osasun publikoko, hezkuntzako eta ingurumeneko proiektuak egiaztatzen ari da Senegalen

Gipuzkoako Foru Aldundiko Kultura eta Lankidetzako Departamentua, egun hauetan, tokian bertan aztertzen ari da beharrezkoa ote den garapenerako laguntzen urteroko deialdiak egokitzea, nazioarteko lankidetza gaietan Europa ezartzen ari den irizpideak bete ditzaten.  Europar Batasuneko erakundeek lehentasuna ematen diote Afrikari, muga partekatzen dugulako; gainera, une honetan, guztiz zentzuzkoa bihurtu da migrazio fluxu klandestino ugariren sorburu diren eskualdeen garapena laguntzea.

Egun hauetan Gipuzkoan ezagutzen ari gara Mediterraneo aldeko herrialdeetan bizi duten migrazio krisiarekin lotutako gertaera batzuk. Testuinguru horretan, Foru Aldundiko ordezkaritza bat Senegaleko zenbait leku bisitatzen ari da bi asmorekin, batetik, gobernuz kanpoko erakunde ezberdinen bidez herrialde horren garapenerako xedatzen dituen funtsen helmuga egiaztatzea, eta, bestetik, Bizkaiko Foru Aldundiak gaur egun finantzatzen dituen beste proiektu batzuk ikuskatzea, bidaia ofizial hau Bizkaiko Foru Aldundiarekin batera antolatu baita. 

Kultura eta Lankidetzako foru diputatuak esan duenez, “Kebemerreko dunak basoberritzeko proiektuari gehituko zaio, aurten, Mamadou Dia gazteak zuzentzen duen Ha Ha Tay kolektiboak Gandiol eskualdean aurkeztutako beste bat, hain zuzen ere anbulatorio bat hobetu eta handitzekoa, biztanleriaren sexu eta ugalketa osasunean bereziki pentsatuz, eta batez ere baldintza oso eskasetan erditzen diren ehunka emakumeren egoera kontuan hartuta”.

Alabaina, Gipuzkoak Kebemer eskualdean iaztik daukan proiekturik garrantzitsuena da Solidaridad Internacional erakundeari laguntzea Sahel lerroan, basamortuaren eta Saharaz hegoaldeko Afrikaren arteko muga markatzen duen lerroan, desertifikazioa geldiarazten. Afrikako 13 herrialde parte hartzen ari dira Harresi Handi Berdearen proiektuan, eta Senegal, aspaldi honetan, lan horretan ari da estatuaren eta Europako lankidetzako erakundeen laguntzaz. Gipuzkoak 50.000 euroko ekarpena egin du bertako espezietako 50.000 zuhaitz landatzeko, eta horien bitartez tokiko ekonomia askoren sostengu diren labore lur emankorretara zabaltzen ari diren dunak geldiarazteko.

Lehenengo ikuskapenen ondoren, Itxasok jakinarazi dio Guillermo Martínezi, Médicos del Mundo gobernuz kanpoko erakundearen Senegaleko arduradunari, parte hartu nahi dutela osasun publikoko proiektuetan, Senegaleko hegoaldean; baita lesbiana, gay, transexual eta bisexualen kolektiboei arreta eta laguntza eskaintzeko beste proiektu batzuetan ere, kolektibo horiek bereziki jazarriak eta estigmatizatuak baitaude eta kolektibo horietan biltzen baitira HIESa eta sexu-harremanen bidez kutsatzen diren gaixotasunak dituzten pertsona gehienak. Senegalek baldintza aproposak ditu Afrikako kontinentera bideratutako laguntza sendotzeko; izan ere, azken hamarkada hauetan, Afrika bigarren maila batean egon da, eta ez da izan Foru Aldundiak bideratutako laguntza humanitarioaren hartzaile nagusia. Lankidetzako erakundeek lan egin dezakete nahiko seguru eta eroso, eta egonkortasun politikoak epe luzeko proiektuei segida ematea ahalbidetzen du.

“Botere publikook indartu egin behar dugu tokiko komunitateen garapenerako egin dezakeguna. Azkeneko aste hauetan, Mediterraneoan gertatzen ari den drama humanitarioaren lekuko izaten ari gara, eta eztabaida politiko guztietan bi gai nagusi dira hizpide, batetik, mugak hobeto kontrolatu eta zaintzeko premia, eta, bestetik, Europako hegoaldeko kostaldeetara iristen ari diren ehunka ontziri arreta eta lehorreratzeko portu seguruak emateko modua”. 

“Gure asmoa  da -esan du amaitzeko Denis Itxasok- arreta-gunea jartzea migrazio masibo hori eragiten duten egiturazko arrazoietan, eta aztertzea gure funtsak behar bezala erabiltzen ari ote diren hegoaldearen eta iparraldearen arteko desparekotasun izugarri hori jatorrian bertan gutxitzeko. Foru Aldundiko Kulturako eta Garapenerako Lankidetzako Departamentuak zabaldu egin nahi ditu eskualde horretan gaur egun dituen lankidetzako proiektuak, Europar Batasunak garapenerako lankidetza Afrika kontinentean ardazteko eta lehenesteko ezarritako estrategiari erantzutearren”.